Pas një dekade të mbushur me trofe te Manchester City, mesfushori belg Kevin De Bruyne pritet të largohet nga klubi në fund të këtij sezoni. Lajmi se City nuk do t’i ofrojë rinovim ka shkaktuar jehonë në botën e futbollit, ndërsa disa klube tashmë kanë filluar përpjekjet për ta siguruar shërbimin e 33-vjeçarit.
Sipas raportimeve të Sky Italy, Napoli është një nga klubet më të interesuara për transferimin e yllit belg. Drejtori sportiv i klubit italian, Giovanni Manna, mësohet se ka udhëtuar në Manchester për të takuar personalisht De Bruynen dhe për t’i paraqitur projektin sportiv të Napolit. Gazetari Gianluca Di Marzio bën të ditur se lojtari po e shqyrton seriozisht ofertën së bashku me familjen dhe agjentët e tij.
Faktorë të tjerë që mund të ndikojnë në vendimin e tij janë miqësia me Romelu Lukakun, bashkëlojtar në kombëtare dhe sulmues aktual i Napolit, si dhe dëshira e De Bruynes për të qëndruar në Europë. Madje, mediat belge raportojnë se bashkëshortja e tij, Michele Lacroix, është parë në Napoli duke kërkuar banesë. Çifti ka lidhje sentimentale me rajonin, pasi është martuar në Sorrento, afër Napolit. Po ashtu, ish-shoku i skuadrës Dries Mertens, një legjendë e Napolit, ruan banesën dhe miqësinë me familjen De Bruyne.
Ndërkohë, edhe klubet jashtë Europës nuk qëndrojnë pasivë. Në Shtetet e Bashkuara, Inter Miami – klubi i Lionel Messit dhe bashkëpronësuar nga David Beckham – ka siguruar të drejtat e para për të negociuar me De Bruynen në MLS. Megjithatë, Inter Miami tashmë ka tre lojtarë të klasifikuar si “Designated Players”, çka e vështirëson transferimin e tij pa kufizime financiare. Një alternativë do të ishte përdorimi i fondeve të veçanta të ligës, por kjo do ta ulte ndjeshëm pagën e De Bruynes në sezonin e parë.
Në këtë sfond, Chicago Fire ka dalë si një konkurrent serioz në MLS, me hapësira të lira në listën e “Designated Players” dhe aftësi financiare për ta përballuar një marrëveshje të tillë. Gjithsesi, do t’i duhet të negociojë me Inter Miamin për blerjen e të drejtave të transferimit brenda ligës.
Nga ana tjetër, edhe klubet nga Arabia Saudite mbeten në garë. De Bruyne ka qenë në kontakt me disa prej tyre, ndërsa klubi Neom SC, që kryeson në ligën e dytë saudite, përmendet si një pretendent serioz. Megjithatë, sipas burimeve pranë lojtarit, ai preferon të qëndrojë në Europë ose të transferohet në SHBA, për shkak të stilit të jetës dhe familjes së tij.
Rruga drejt vendimit përfundimtar mbetet e hapur, ndërsa De Bruyne po vlerëson me kujdes opsionet që i ofrohen për kapitullin e ri të karrierës së tij.
