Kryeministri i Shqipërisë, Edi Rama, ka njoftuar ndryshime të reja në kabinetin qeveritar. Besfort Lamallari largohet nga drejtimi i Ministrisë së Brendshme, ndërsa në këtë post emërohet Ervin Demo.
Sipas Ramës, me këtë ndryshim do të bashkohen edhe çështjet e pushtetit vendor me Ministrinë e Brendshme, të cilat deri tani mbuloheshin nga Demo në kuadër të Ministrisë së Pushtetit Vendor.
“Lamallari nga drejtimi i Ministrisë së Brendshme kalon në stolin tim bashkë me mua dhe ekipin këtu në Kryeministri, ndërkohë që Demo, ministri i Pushtetit Vendor, do të mbulojë punët e brendshme, ku do të integrojmë edhe çështjet vendore”, deklaroi Rama.
Kryeministri tha se përfshirja e pushtetit vendor në strukturën e Ministrisë së Brendshme nuk është diçka e re në historikun e këtij dikasteri, por sipas tij, tashmë kjo strukturë do të ketë një formë më të plotë.
Lamallari largohet nga kabineti
Besfort Lamallari u përfshi për herë të parë në kabinetin qeveritar më 11 shtator 2025, në fillim të mandatit të katërt të qeverisë Rama, kur mori drejtimin e Ministrisë së Drejtësisë.
Më 26 shkurt, gjatë ndryshimeve të mëdha në kabinet, Lamallari u transferua në Ministrinë e Brendshme, një dikaster ku kishte shërbyer më herët për një periudhë të gjatë si zëvendësministër.
Tashmë, ai nuk do të mbajë një post ministror, por sipas Ramës do të jetë pjesë e ekipit të Kryeministrisë.
Pas largimit nga Ministria e Brendshme, Lamallari falënderoi kryeministrin për besimin dhe tha se përvoja në qeveri kishte qenë e rëndësishme për zhvillimin e tij profesional.
“Faleminderit shumë kryeministër për besimin në këto 10 vite. Do të thoja se jam rritur profesionalisht. Pjesa e kthimit në shtëpinë time ka qenë një përvojë dhe një privilegj i madh. Ka qenë një përvojë e jashtëzakonshme dhe jam munduar që të mos ju zhgënjej. Është kënaqësi dhe nder të jem në krahun tuaj për të gjitha punët që e presin Shqipërinë”, u shpreh Lamallari.
Ndërkohë, Ervin Demo pritet të marrë drejtimin e Ministrisë së Brendshme, duke mbuluar njëkohësisht edhe çështjet që lidhen me pushtetin vendor.
Ndryshimet e fundit janë pjesë e lëvizjeve të reja të kryeministrit Rama në kabinetin qeveritar.
