Kryeministri i Izraelit, Benjamin Netanyahu, ka zbuluar në një intervistë për rrjetin amerikan ABC News se vendi i tij ka marrë në konsideratë edhe eliminimin e udhëheqësit suprem të Iranit, Ajatollah Ali Khamenei, si pjesë e strategjisë së tij për t’i dhënë fund asaj që e cilëson si “luftë të përjetshme”.
Në një deklaratë të drejtpërdrejtë, Netanyahu konfirmoi se Izraeli ka shënjestruar edhe më parë shkencëtarë të lartë bërthamorë iranianë, pa dhënë hollësi konkrete mbi operacionet.
“Ne bëjmë atë që duhet bërë. Kjo nuk do ta përshkallëzojë konfliktin, përkundrazi, do ta përfundojë atë”, deklaroi Netanyahu, duke mbrojtur qasjen e tij kundër regjimit iranian.
Sipas kreut të qeverisë izraelite, Irani ka qenë për më shumë se pesë dekada faktor destabilizues në rajon, duke përhapur, siç u shpreh ai, “terrorizëm, frikë dhe kaos në gjithë Lindjen e Mesme”.
“Ky regjim ka bombarduar rafineritë e Aramco-s në Arabinë Saudite, ka mbështetur terrorin, përmbysjet dhe sabotimet kudo,” theksoi Netanyahu.
Ai hodhi poshtë çdo sinjal të Teheranit për dialog diplomatik, duke i cilësuar përpjekjet iraniane për paqe si mashtruese dhe të pabesueshme.
“Ata kanë gënjyer, kanë manipuluar dhe kanë mashtruar Shtetet e Bashkuara. Ne kemi informacion shumë të besueshëm për këtë,” tha ai.
Netanyahu paralajmëroi se rreziku që paraqet Irani nuk është vetëm për Izraelin, por edhe për vendet arabe, Evropën dhe vetë Shtetet e Bashkuara.
“Ne nuk po luftojmë vetëm për veten tonë. Ne jemi pengesa e parë përpara agresionit të tyre. Ata thërrasin ‘Vdekje për Izraelin, vdekje për Amerikën’,” deklaroi ai.
Kryeministri izraelit e përshkroi programin bërthamor iranian si një kërcënim real për sigurinë ndërkombëtare, duke e krahasuar ekipin shkencor të Iranit me “ekipin bërthamor të Hitlerit”.
Këto deklarata vijnë në një kohë tensioni të lartë mes dy vendeve dhe rrisin shqetësimet për një përshkallëzim të mëtejshëm në Lindjen e Mesme, me pasoja që mund të kapërcejnë kufijtë rajonalë.
