Autoriteti i Konkurrencës i Kosovës (AKK) ka njoftuar se ka nisur monitorimin e tregut të karburanteve në Kosovë, duke përfshirë tregtimin me shumicë dhe me pakicë, me fokus të veçantë te çmimet e naftës dhe benzinës në pikat e shitjes.
Sipas AKK-së, të gjitha ndërmarrjet që operojnë në tregtimin e karburanteve në vend janë aktualisht nën monitorim.
Autoriteti bëri të ditur se përmes këtij procesi synohet mbrojtja e tregut nga marrëveshjet e ndaluara, abuzimi me pozitën dominuese dhe praktikat e bashkërenduara ndërmjet kompanive që veprojnë në këtë sektor.
“Çdo marrëveshje, bashkërendim apo veprim i njëanshëm ndërmjet bizneseve që ka për qëllim ose efekt rritjen artificiale të çmimeve, ndarjen e tregut apo kufizimin e konkurrencës përbën shkelje të rëndë të ligjit dhe është subjekt i sanksioneve ligjore”, thuhet në njoftimin e AKK-së.
Sipas Autoritetit, çmimet e karburanteve në tregjet ndërkombëtare ndryshojnë vazhdimisht, duke reflektuar faktorë si oferta dhe kërkesa, kostot e përpunimit dhe zhvillimet ekonomike apo gjeopolitike.
Për këtë arsye, pritet që edhe luhatjet e çmimeve në tregun vendor të pasqyrojnë drejtimin dhe përmasën e ndryshimeve në tregjet ndërkombëtare, duke respektuar parimet e transparencës dhe konkurrencës së ndershme.
AKK u ka bërë thirrje bizneseve që të veprojnë në përputhje me rregullat e konkurrencës së lirë dhe të shmangin çdo formë koordinimi të çmimeve me operatorë të tjerë, duke treguar përgjegjësi ndaj qytetarëve dhe konsumatorëve.
Procesi i monitorimit po zhvillohet në bashkëpunim me institucionet tjera relevante, përfshirë Ministrinë e Industrisë, Ndërmarrësisë dhe Tregtisë, Administratën Tatimore të Kosovës dhe Doganën e Kosovës, me qëllim sigurimin e respektimit të plotë të legjislacionit në fuqi në tregun e karburanteve.
