Një incident ka ndodhur mëngjesin e 18 majit 2025 në Klinikën e Psikiatrisë në Prishtinë, ku një pacient është larguar nga objekti spitalor pa autorizim. Lajmin e ka konfirmuar portali Sinjali, duke u mbështetur në burime brenda institucionit shëndetësor.
Sipas informatave, bëhet fjalë për 45-vjeçarin Besfort Kollqaku, i cili ka dalë nga ambientet e klinikës rreth orës 11:00, duke vënë në alarm stafin mjekësor që menjëherë ka njoftuar Policinë e Kosovës.
Megjithëse mjekët kujdestarë kanë theksuar se Kollqaku nuk paraqet rrezik për rrethinën dhe nuk është person agresiv, ata janë të shqetësuar për sigurinë e tij për shkak të gjendjes së tij të rënduar shëndetësore.
Personeli ka dhënë edhe përshkrimin e fundit të pacientit: ai ishte i veshur me xhaketë të zezë dhe mbante kapele të zezë. Kollqaku është banor i Prishtinës dhe, sipas të njëjtave burime, nuk është hera e parë që ai largohet pa paralajmërim nga klinika.
Policia ka nisur kërkimet për ta lokalizuar dhe kthyer në trajtim personin në fjalë.
