Politikani konservator Rodrigo Paz është betuar sot si presidenti i ri i Bolivisë, duke mbyllur një epokë prej gati dy dekadash sundimi të njëpartishëm nga Lëvizja Drejt Socializmit (MAS) dhe duke premtuar ta nxjerrë vendin nga kriza më e rëndë ekonomike në 40 vjet.
Në ceremoninë e zhvilluar në La Paz, Paz, 58 vjeç, ngriti dorën e djathtë para Biblës dhe kryqit, duke u zotuar me fjalët: “Zot, vend dhe familje, betohem.” Ai deklaroi se synon të rikthejë stabilitetin ekonomik dhe moral të Bolivisë, e cila po përballet me mungesa të karburantit, çmime të larta ushqimore dhe mungesë të dollarëve amerikanë.
“Vendi që trashëguam është i shkatërruar moralisht dhe materialisht, me tregje bosh e radhë të pafundme për karburant. Bolivia nuk do të mbahet më peng i ideologjisë – ajo nuk vë ushqim në tryezë,” tha Paz në fjalimin e tij të parë si president.
Ai mundi në balotazh ish-presidentin Jorge “Tuto” Quiroga, një figurë të njohur të djathtë, duke befasuar analistët politikë dhe fituar mbështetjen e një popullsie të lodhur nga krizat e zgjatura ekonomike.
Paz premtoi reforma të mëdha ekonomike, por me një qasje graduale, ndryshe nga Quiroga që kishte propozuar një program “shoku fiskal” dhe bashkëpunim të menjëhershëm me FMN-në.
Pas fitores së tij më 20 tetor, Paz ka sinjalizuar një ndryshim të kursit të politikës së jashtme, duke u distancuar nga blloku ALBA (ku bëjnë pjesë Kuba, Nikaragua dhe Venezuela) dhe duke afrimi marrëdhëniet me Shtetet e Bashkuara. Ai tashmë ka njoftuar një marrëveshje prej 3.1 miliardë dollarësh me Korporatën e Zhvillimit të Andeve për rimëkëmbjen ekonomike dhe ka deklaruar gatishmërinë për bashkëpunim me institucionet ndërkombëtare financiare dhe agjencinë amerikane DEA, të dëbuar nga Bolivia në vitin 2008.
Në ceremoninë e inaugurimit morën pjesë liderë të rajonit, përfshirë presidentët Javier Milei (Argjentinë), Gabriel Boric (Kili), Daniel Noboa (Ekuador), Yamandú Orsi (Uruguai) dhe Santiago Peña (Paraguai).
Paz pranoi se e pret një rrugë e vështirë përpara, pasi partia e tij Kristian Demokratike kontrollon vetëm 39% të Asamblesë Legjislative me 166 vende. “Nuk na është dhënë një fron, por një detyrë. Kjo është koha për demokraci të vërtetë dhe respekt për ligjin — askush nuk është mbi të,” tha presidenti i ri i Bolivisë, duke shënuar fillimin e një kapitulli të ri për kombin andean.
