Pas përfundimit pa marrëveshje të negociatave mes Shtetet e Bashkuara dhe Iranit, Pakistani ka bërë thirrje urgjente për ruajtjen e armëpushimit dhe vazhdimin e dialogut mes palëve.
Ministri i Jashtëm pakistanez Ishaq Dar theksoi se respektimi i armëpushimit është “absolutisht i domosdoshëm”, duke shtuar se vendi i tij do të vazhdojë të luajë rolin e ndërmjetësit për të lehtësuar komunikimin mes Uashingtonit dhe Teheranit.
A do të vazhdojnë negociatat?
Pavarësisht dështimit fillestar, sinjalet tregojnë se dera për dialog mbetet e hapur. Zëvendëspresidenti amerikan JD Vance deklaroi se SHBA-të kanë lënë një ofertë në tryezë, ndërsa nga pala iraniane nuk është përjashtuar mundësia e bisedimeve të mëtejshme.
Edhe presidenti amerikan Donald Trump ka lënë të kuptohet se negociatat mund të rifillojnë, duke u shprehur se pret që Irani “të kthehet dhe të pranojë kushtet”.
Sipas raportimit të Deutsche Welle, kontaktet mund të vazhdojnë edhe në prapaskenë, një praktikë e zakonshme në diplomacinë mes dy vendeve.
Pse dështuan bisedimet?
Delegacioni amerikan e lidhi dështimin me refuzimin e Iranit për të hequr dorë nga programi bërthamor. Vance kërkoi “garanci të qarta” se Teherani nuk do të zhvillojë armë nukleare.
Nga ana tjetër, përfaqësuesit iranianë kanë mbajtur një qëndrim të fortë, duke theksuar se nuk do të ndalin përpjekjet për të mbrojtur interesat kombëtare dhe arritjet e tyre strategjike.
Paralajmërimet e ekspertëve
Eksperti i sigurisë Peter Neumann vlerëson se negociatat nuk janë të dështuara përfundimisht, por paralajmëron se një marrëveshje kërkon lëshime nga të dyja palët.
Sipas tij, SHBA-të nuk mund të imponojnë kushte pa kompromis nëse synojnë stabilitet afatgjatë dhe zgjidhje reale për çështjen bërthamore dhe sigurinë në rajon.
Situata mbetet e brishtë
Ndërkohë, tensionet në Lindjen e Mesme vazhdojnë të mbeten të larta, ndërsa e ardhmja e armëpushimit dhe procesit diplomatik mbetet e pasigurt.
Megjithatë, fakti që asnjëra palë nuk e ka mbyllur plotësisht derën për dialog lë hapësirë për negociata të reja – ndoshta këtë herë larg syrit të publikut.
