Grupi Parlamentar i Partisë Demokratike të Kosovës (PDK) i ka kërkuar presidentes së Kosovës, Justina Shiroka-Pula, që ta rikthejë në Kuvend për rishqyrtim Ligjin për ndryshimin dhe plotësimin e Ligjit për Dhomat e Specializuara dhe Zyrën e Prokurorit të Specializuar.
Përmes një letre zyrtare, PDK-ja ka bërë të ditur se kërkesa vjen pas konsultimeve të gjera dhe synon plotësimin e disa dispozitave, si dhe forcimin e sigurisë juridike të ligjit, me qëllim të mbrojtjes së të drejtave kushtetuese të ish-krerëve të Ushtrisë Çlirimtare të Kosovës (UÇK), të cilët po gjykohen në Hagë.
Në njoftimin e saj, PDK-ja ka theksuar se është krenare për nismën ligjore dhe mbështetjen që ajo ka marrë, duke vlerësuar se mbrojtja e UÇK-së, e vlerave të luftës çlirimtare dhe e ish-krerëve të saj mbetet një përgjegjësi e panegociueshme.
PDK-ja: Ligji është finalizuar në pjesën dërrmuese
Sipas PDK-së, pjesa më e madhe e ligjit tashmë është përfunduar, ndërsa rishqyrtimi synon një verifikim përfundimtar profesional dhe adresimin e elementeve që mund të pengojnë zbatimin e tij.
“Kërkesa është për rikthim në Kuvend, jo në Qeveri apo për nisjen e punës nga e para. Ky proces duhet t’i shërbejë finalizimit dhe hyrjes së ligjit në fuqi, pa vonesa të panevojshme”, thuhet në njoftim.
PDK-ja u ka bërë thirrje ekspertëve që kanë shprehur gatishmëri për të kontribuar, përfshirë Avokatin e Popullit, që të paraqesin propozime konkrete për plotësimin e ligjit.
Synojnë miratimin e sërishëm brenda katër javësh
Partia Demokratike e Kosovës pret që ligji, i miratuar në Kuvend më 6 tetor 2026, të votohet sërish brenda katër javësh, pas përfshirjes së përmirësimeve të nevojshme.
“Presim që, ashtu siç e miratuam më 6 tetor 2026, ta miratojmë sërish brenda 4 javësh, duke falënderuar të gjithë ata që e kanë mbështetur këtë ligj dhe që do të kontribuojnë në finalizimin e tij”, thuhet në deklaratën e partisë.
Ndërkohë, PDK-ja ka bërë të ditur se do të vazhdojë angazhimin për hartimin e një strategjie të koordinuar shtetërore për fazën e apelit në Hagë, sigurimin e fondeve të nevojshme dhe ofrimin e mbështetjes profesionale për mbrojtjen e ish-krerëve të UÇK-së.
Sipas kësaj partie, mbështetja për fazën e apelit dhe finalizimi i ligjit duhet të ecin paralelisht.
“Gatishmëria për ta përmirësuar ligjin nuk është në asnjë mënyrë tërheqje prej tij. PDK-ja nuk do të heqë dorë nga hyrja e tij në fuqi assesi”, theksohet në reagim.
Në përfundim, PDK-ja ka ritheksuar se qëndron prapa nismës së saj ligjore dhe zotimit për të mbështetur ish-krerët e UÇK-së që po gjykohen në Hagë.
