Seanca e 28-të për konstituimin e Kuvendit të Kosovës ka dështuar përsëri, pasi mungoi pajtimi ndërmjet partive për mënyrën e votimit të kryetares së Kuvendit. Lëvizja Vetëvendosje (VV) mbeti e palëkundur në qëndrimin e saj që kandidatja për kryetare, Albulena Haxhiu, të votohet përmes një procesi të fshehtë.
Në këtë seancë, propozimi i VV-së për formimin e një komisioni që do të organizonte votimin e fshehtë mori vetëm 48 vota pro, me një votë kundër dhe asnjë abstenim – duke mos arritur kuorumin e nevojshëm për miratim.
Pas dështimit të votimit, kryesuesi i seancës konstituive, Avni Dehari, njoftoi ndërprerjen e seancës dhe caktoi përpjekjen e radhës për të hënën, ora 11:00.
Lëvizja Vetëvendosje kishte propozuar për herë të parë formimin e një komisioni për votim të fshehtë në fillim të muajit maj, pasi kandidatja e tyre, Albulena Haxhiu, nuk arriti të sigurojë votat e nevojshme në gjashtë tentativa të njëpasnjëshme.
Ndërkohë, çështja e votimit të fshehtë është dërguar për interpretim në Gjykatën Kushtetuese nga Aleanca për Ardhmërinë e Kosovës (AAK), me mbështetjen e Partisë Demokratike të Kosovës (PDK) dhe Lidhjes Demokratike të Kosovës (LDK).
Kuvendi i legjislaturës së nëntë është mbledhur për herë të parë më 15 prill, por deri më tani janë përfunduar vetëm dy pika të rendit të ditës: votimi i raportit të Komisionit për verifikimin e mandateve dhe betimi i deputetëve.
Pavarësisht disa zërave për kompromis, VV vazhdon të insistojë në kandidaturën e Albulena Haxhiut, ndërkohë që PDK dhe AAK janë shprehur të gatshme të mbështesin një emër tjetër, nëse VV ndryshon kandidaten.
