Tensionet në Lindjen e Mesme janë përshkallëzuar sërish pas përplasjes së re ushtarake mes Shteteve të Bashkuara dhe Iranit në Ngushticën e Hormuzit.
Një zëdhënës ushtarak iranian deklaroi se SHBA-ja ka shkelur armëpushimin dhe ka sulmuar anije iraniane në zonën strategjike të Hormuzit, duke paralajmëruar reagim të ashpër nga Teherani.
“Ne do t’i përgjigjemi çdo sulmi me forcë dhe pa hezitim”, deklaroi zyrtari iranian.
Sipas agjencisë iraniane të lajmeve Tasnim, forcat iraniane kanë lëshuar raketa dhe dronë ndaj tre shkatërruesve amerikanë, pasi pretenduan se ushtria amerikane kishte sulmuar një tanker iranian nafte pranë ishullit Qeshm.
“Pas sulmit ushtarak amerikan ndaj një tankeri iranian të naftës, anijet armike në Ngushticën e Hormuzit u vunë në shënjestër të raketave iraniane”, citohet të ketë thënë një zyrtar ushtarak iranian.
Nga ana tjetër, United States Central Command deklaroi se forcat amerikane vepruan në vetëmbrojtje, pasi sipas tyre u përballën me sulme të paprovokuara nga Irani.
“Ne nuk duam përshkallëzim, por jemi të pozicionuar dhe të gatshëm për të mbrojtur forcat amerikane”, thuhet në reagimin e CENTCOM.
Komanda Qendrore Amerikane bëri të ditur se gjatë operacionit janë goditur objektiva ushtarake iraniane të përdorura për sulme ndaj forcave amerikane, përfshirë pozicione për lëshimin e raketave dhe dronëve.
Ngushtica e Hormuzit mbetet një nga pikat më të ndjeshme strategjike në botë, pasi përmes saj kalon një pjesë e madhe e eksporteve globale të naftës. Përplasjet e fundit kanë rritur frikën për një konflikt më të gjerë në rajon dhe për pasoja serioze në tregjet ndërkombëtare të energjisë.
