Komisioni Qendror i Zgjedhjeve (KQZ) ka publikuar të dhënat e fundit për pjesëmarrjen në zgjedhjet e parakohshme për Kuvendin e Kosovës, sipas të cilave deri në orën 13:00 kanë votuar 311,127 qytetarë, apo 15.87 për qind e trupit elektoral.
Sipas statistikave zyrtare, nga 1,959,962 votues me të drejtë vote në vend, procesi i raportimit është përmbyllur në 2,486 nga 2,498 vendvotime, që përbën 99.52 për qind të vendvotimeve të procesuara.
Krahasuar me zgjedhjet parlamentare të 28 dhjetorit 2025, kur pjesëmarrja në të njëjtën periudhë kohore ishte 18.60 për qind, këtë herë është shënuar një rënie prej rreth 2.73 pikë përqindjeje.
Komunat me pjesëmarrjen më të lartë
Komunat me daljen më të madhe të votuesve deri në mesditë janë:
- Leposaviq – 35.90%
- Zveçan – 34.51%
- Ranillug – 34.36%
- Graçanicë – 30.75%
- Novobërdë – 29.74%
Ndërsa pjesëmarrje mbi mesataren kombëtare kanë shënuar edhe Prishtinë me 21.18%, Shtërpcë me 21.10% dhe Obiliq me 19.89%.
Komunat me pjesëmarrjen më të ulët
Në anën tjetër, komunat me daljen më të ulët të votuesve deri në orën 13:00 janë:
- Dragash – 7.24%
- Rahovec – 9.62%
- Klinë – 10.60%
- Malishevë – 10.71%
- Prizren – 12.38%
Prishtina me mbi 46 mijë votues
Në kryeqytet, deri në orën 13:00 kanë votuar 46,517 qytetarë nga 219,654 votues të regjistruar, duke e çuar pjesëmarrjen në 21.18 për qind, një nga përqindjet më të larta në mesin e komunave të mëdha të vendit.
KQZ pritet të publikojë përditësimin e radhës të pjesëmarrjes gjatë pasdites, ndërsa qendrat e votimit do të mbeten të hapura deri në orën 19:00.
