Policia e Kosovës ka bërë të ditur se ka identifikuar origjinën e kërcënimit të publikuar ndaj kryeministrit në detyrë, Albin Kurti, në rrjetet sociale, duke theksuar se postimi është bërë nga territori i Serbisë, përkatësisht nga qyteti i Kralevës.
Sipas njoftimit zyrtar të Policisë të publikuar të premten në mbrëmje, hetimet janë zhvilluar menjëherë pasi autoritetet kanë pranuar informacionin për kërcënimin e publikuar nga profili “Severna Brigada”, organizatë e shpallur terroriste nga institucionet e Kosovës.
Policia bëri të ditur se rasti është trajtuar në koordinim me Prokurorinë Speciale të Kosovës dhe me mbështetjen e Drejtorisë për Hetimin e Krimeve Kibernetike.
“Kërcënimi është publikuar përmes llogarisë në Facebook ‘facebook.com/severna.brigada.2025’, ndërsa nga hetimet është konstatuar se postimi është realizuar nga Serbia”, thuhet në njoftim.
Sipas autoriteteve, gjatë hetimeve janë identifikuar IP-adresa e përdorur dhe të dhënat personale të përdorura gjatë regjistrimit të llogarisë.
Policia ka bërë të ditur se njësitë kompetente kanë siguruar edhe informacione shtesë që pritet të ndihmojnë në vazhdimin e hetimeve dhe zbardhjen e plotë të rastit.
