Miliona përdorues të rrjeteve sociale në mbarë botën po përballen me probleme teknike në platformat e Meta, pasi Instagram, Facebook dhe Messenger kanë shfaqur ndërprerje dhe vështirësi në funksionim gjatë orëve të fundit.
Sipas raportimeve të shumta nga përdoruesit, shumë prej tyre nuk po arrijnë të hyjnë në llogaritë e tyre, ndërsa të tjerë po përballen me shkëputje të shpeshta nga platformat.
Problemet nuk mbarojnë me kaq. Edhe përdoruesit që arrijnë të lidhen me sukses raportojnë vështirësi në përdorimin e disa funksioneve, veçanërisht me publikimin dhe shikimin e “story”-ve në Instagram dhe Facebook.
Deri më tani, Meta nuk ka dhënë një njoftim zyrtar mbi shkakun e ndërprerjes, ndërsa mbetet e paqartë nëse bëhet fjalë për një defekt teknik global apo për probleme të përkohshme në serverë.
Ndërkohë, mijëra ankesa janë shpërndarë edhe në platforma të tjera online, me përdorues që konfirmojnë se problemet me shërbimet e Meta-s po ndihen në shumë vende të botës.
