Zyra e Prokurorit të Specializuar (ZPS) ka njoftuar se nuk do të mbështesë disa nga pretendimet e përfshira më parë në aktakuzën ndaj ish-krerëve të UÇK-së, Hashim Thaçi, Kadri Veseli, Rexhep Selimi dhe Jakup Krasniqi.
Sipas njoftimit të ZPS-së, bëhet fjalë për pretendimet që lidhen me ndalimin dhe keqtrajtimin e një personi në Ferizaj, si dhe për vrasjen e një tjetri – të cilat nuk do të përdoren më si pjesë e provave gjatë procesit gjyqësor.
Prokuroria ka sqaruar gjithashtu se, për arsye të efikasitetit të procedurës dhe në interes të drejtësisë, ka vendosur të tërhiqet edhe nga pretendimet që implikonin Jakup Krasniqin në vizita në dhomat e ndalimit në Malishevë. Po ashtu, nuk do të mbështetet as pretendimi se Rexhep Selimi ka kërcënuar një person në tetor të vitit 1998 – identiteti i të cilit mbetet i redaktuar për publikun.
ZPS ka konfirmuar se të gjithë emrat e të ndaluarve, viktimave apo të kërcënuarve të përmendur në këto pretendime mbeten të redaktuar. Gjithashtu, është bërë e ditur se dy nga rastet e redaktuara i referohen të njëjtit person dhe jo individëve të ndryshëm, pa ofruar detaje të mëtejshme mbi përmbajtjen.
Këto zhvillime vijnë pasi më 15 prill 2025, Prokuroria njoftoi përfundimin e paraqitjes së provave në këtë çështje. Aktakuza e ndryshuar dhe e konfirmuar ndaj Thaçit, Veselit, Selimit dhe Krasniqit ishte dorëzuar më 30 shtator 2022 dhe përfshin dhjetë pika që i ngarkojnë të akuzuarit me krime lufte dhe krime kundër njerëzimit.
Më herët, më 29 prill 2022, ZPS kishte dorëzuar një version tjetër të aktakuzës ku përfshiheshin edhe lokacione të reja të krimeve të supozuara, përfshirë Gjilanin, Budakovën dhe Semetishtën.
Të katër të akuzuarit janë deklaruar të pafajshëm në paraqitjet e tyre fillestare në nëntor të vitit 2020, ndërsa aktakuza e parë është konfirmuar më 26 tetor të po atij viti.
