Në ditën e 23-të të protestës para Kryeministrisë në Tiranë, ish-luftëtari i UÇK-së, Dritan Goxhaj, në emër të grupit koordinues të protestës, paraqiti kërkesat kryesore të protestuesve, duke kërkuar dorëheqjen e menjëhershme të kryeministrit Edi Rama dhe të gjithë qeverisë.
Sipas Goxhajt, kërkesa e parë dhe e panegociueshme mbetet dorëheqja e kryeministrit dhe qeverisë. Kërkesa e dytë është krijimi i një qeverie teknike dhe tranzitore, jopartiake, me mandat 12-mujor.
Ai prezantoi edhe kërkesën e tretë, e cila lidhet me ndryshime kushtetuese që do të miratoheshin përmes referendumit popullor, duke përfshirë:
- ndryshimin e Kodit Zgjedhor;
- ndryshimin e ligjit për financimin e partive politike dhe organizatave të ndryshme;
- kufizimin e mandatit të kryeministrit në jo më shumë se dy mandate, të plota ose të pjesshme, gjatë gjithë jetës.
Protestuesit ritheksuan gjithashtu kërkesat e mëhershme:
- anulimin e ndryshimeve për zonat e mbrojtura;
- anulimin e ndryshimeve në ligjin për trashëgiminë kulturore;
- shfuqizimin e paketës ligjore të njohur si “Pakti i Maleve”;
- shfuqizimin e kuadrit ligjor për investimet strategjike.
Goxhaj deklaroi se synim i protestës është edhe hartimi i një kontrate të re sociale mes qytetarëve dhe shtetit, e cila, sipas tij, do të përpilohet pas konsultimeve me intelektualë, ekspertë teknikë dhe qytetarë apartiakë të propozuar nga vetë protestuesit.
Në këtë deklaratë u vu re mungesa e plotë e referencave ndaj Sali Berisha, ndryshe nga protestat e mëparshme ku turma kishte drejtuar kritika edhe ndaj tij. Ende mbetet e paqartë se kë përfaqëson zyrtarisht grupi koordinues, pasi organizatorët nuk janë bërë publikë.
Nuk vonoi as reagimi i kryeministrit Edi Rama, i cili e lidhi Goxhajn me qëndrime pro-Iranit, duke iu referuar postimeve të tij të mëparshme në rrjete sociale.
“Mos harroni çfarë ju kam thënë që në fillim: dy fitues do të dalin nga kjo protestë – Partia Socialiste, që do të bëhet më e fortë, dhe qeverisja jonë, që do të përmirësohet ndjeshëm”, shkroi Rama.
Ndërkohë, një nga nismëtaret e protestës, Luciana Kokaj, banore e Rrjollit, deklaroi se misioni i protestuesve mbetet largimi i klasës aktuale politike dhe pastrimi i vendit nga korrupsioni dhe keqqeverisja.
