Është lansuar raporti i Institutit për Krimet e Kryera gjatë Luftës në Kosovë (IKKL), i cili përmban listën preliminare të personave të vrarë, të zhdukur me dhunë dhe personave që kanë humbur jetën si pasojë e luftës në Kosovë.
Në ceremoninë e publikimit të raportit, kryeministri në detyrë, Albin Kurti, bëri të ditur se për periudhën nga 1 janari 1998 deri më 20 qershor 1999, janë dokumentuar gjithsej 12.230 viktima të luftës në Kosovë.
Kurti tha se lista do të vazhdojë të përditësohet me të dhëna të reja që do të pranojë Instituti, duke theksuar rëndësinë e dokumentimit të saktë të viktimave të luftës.
“Nuk ka drejtësi pa të vërtetën, nuk ka shërim pa drejtësi dhe nuk ka qëndrueshmëri pa kujtesë. Ky raport është dëshmi institucionale e çmimit të shtrenjtë të lirisë që e gëzojmë së bashku”, ka deklaruar Kurti.
Sipas tij, raporti nuk paraqet vetëm shifra, por përfaqëson njerëz, familje dhe histori të cilat, siç u shpreh ai, shteti ka përgjegjësi t’i dokumentojë me saktësi, dinjitet dhe përgjegjësi.
Raporti i IKKL-së pritet të shërbejë si një bazë institucionale për dokumentimin e pasojave të luftës dhe për ruajtjen e kujtesës historike për viktimat e konfliktit në Kosovë.
