Një punëtor 29-vjeçar ka humbur jetën të martën në Zubin Potok, pasi dyshohet se ishte lënduar rëndë gjatë kryerjes së punimeve në ndërtimin e stacionit të ri policor.
Policia e Kosovës ka bërë të ditur se më 1 shtator 2026, rreth orës 10:00, ka pranuar informacion nga Qendra Kryesore e Mjekësisë Familjare në Zubin Potok se një person ishte sjellë në këtë qendër me lëndime të rënda trupore.
Sipas hetimeve fillestare, viktima, punëtor i një kompanie private, dyshohet se ishte lënduar derisa po kryente punime në ndërtimin e stacionit të ri policor në Zubin Potok.
Për shkak të gjendjes së rëndë shëndetësore, personi është dërguar për trajtim në Spitalin Rajonal në Mitrovicë të Veriut. Rreth orës 11:00, mjeku kujdestar ka konstatuar vdekjen e tij.
Në vendin e ngjarjes kanë dalë njësitet përkatëse të Policisë së Kosovës, inspektorët komunalë dhe inspektorët e punës.
Pas këqyrjes së vendit të ngjarjes, është kontaktuar Prokurori i Shtetit, i cili ka urdhëruar inicimin e rastit për veprën penale “Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës”.
Me urdhër të prokurorit, trupi i pajetë i viktimës, i gjinisë mashkullore dhe 29 vjeç, është dërguar në Institutin e Mjekësisë Ligjore për obduksion.
Në lidhje me rastin është intervistuar një person me inicialet B.B., i lindur më 1977, në cilësinë e të dyshuarit. Me urdhër të Prokurorit të Shtetit, atij i është caktuar masa e ndalimit për 48 orë.
Policia ka bërë të ditur se hetimet po vazhdojnë me qëllim të ndriçimit të plotë të rrethanave të rastit.
