Kryetari i Prishtinës, Përparim Rama, ka akuzuar Qeverinë e Kosovës dhe kryeministrin Albin Kurti se kanë ushtruar presion politik ndaj organizatorëve të forumit “Road to 2030: Kosovo on the Mediterranean Stage”, duke pretenduar se është përjashtuar nga lista e folësve.
Përmes një postimi në Facebook, Rama ka thënë se Prishtina është qyteti nikoqir i “Lojërave Mesdhetare 2030”, ndërsa sipas tij, në forumin e organizuar nga European Investors Council (EIC), ai nuk është lejuar të flasë.
Sipas Ramës, organizatorët i kanë thënë se përjashtimi i tij nga fjala ka ardhur me kërkesë direkte të Ministrisë së Sportit.
“Kjo nuk është gafë protokollare. Është vendim politik dhe është presion ndaj organizatorëve!”, ka shkruar Rama.
Ai ka theksuar se, sipas tij, është ironike që një forum i tillë organizohet për koordinim, partneritet dhe investime, ndërsa njëkohësisht kryetari i Prishtinës përjashtohet nga fjala.
Rama e ka cilësuar këtë si pjesë të asaj që ai e quan “mentalitet qeverisës të Albin Kurtit”, duke pretenduar se edhe një projekt me përmasa ndërkombëtare po tentohet të filtrohet përmes interesave partiake dhe kontrollit politik.
“Të organizosh forum për Prishtina 2030 dhe të kërkosh përjashtimin e Kryetarit të Prishtinës nga fjala është institucionalisht absurd dhe politikisht simptomatik”, ka deklaruar ai.
Në fund, Rama ka thënë se Kurti mund të kontrollojë listën e folësve, por sipas tij, “Prishtina 2030” është më e madhe se çdo interes politik.
Deklaratat janë bërë nga kryetari i Prishtinës në një postim publik, ndërsa pretendimet e tij për ndërhyrjen e Ministrisë së Sportit ndaj organizatorëve nuk janë shoqëruar me prova të tjera në postim.
