Kryeministri i Shqipërisë, Edi Rama, ka pritur në Tiranë ambasadoren e Shteteve të Bashkuara të Amerikës në Greqi, Kimberly Guilfoyle.
Takimi u zhvillua në ambientet e Kryeministrisë, ku Rama e priti ambasadoren amerikane në një atmosferë miqësore përpara bisedimeve zyrtare.
Media greke: Në fokus projekti për terminal LNG
Sipas raportimeve të medias greke Energymag, vizita lidhet me zhvillimet në sektorin energjetik në rajon, konkretisht me mundësinë e ndërtimit të një terminali lundrues për gazin e lëngshëm natyror (FSRU) në Shqipëri.
Një projekt i tillë do të kishte rëndësi strategjike për furnizimin me gaz të Ballkanit dhe për forcimin e rolit të rajonit në rrjetin energjetik evropian.
Raportimi thekson se zhvillimi i infrastrukturës për LNG është bërë një prioritet për Evropën, sidomos pas tensioneve në tregjet globale të energjisë dhe përpjekjeve për të diversifikuar burimet e furnizimit me gaz.
Çfarë është një terminal FSRU?
Një FSRU (Floating Storage and Regasification Unit) është një platformë lundruese që shërben për importimin, ruajtjen dhe rigazifikimin e gazit të lëngshëm natyror (LNG).
Në këtë sistem, gazi i lëngshëm transportohet me cisterna detare dhe ruhet në rezervuarë të mëdhenj në temperaturë shumë të ulët. Më pas, përmes pajisjeve speciale, ai rikthehet në gjendje të gaztë dhe dërgohet në rrjetin energjetik përmes tubacioneve.
Terminalet FSRU konsiderohen më të shpejta dhe fleksibël për t’u ndërtuar krahasuar me terminalet tokësore dhe përdoren për të rritur sigurinë energjetike dhe diversifikimin e furnizimit me gaz.
Sipas mediave greke, diskutimet për një projekt të tillë në Shqipëri zhvillohen në një kohë kur Greqia po synon të forcojë rolin e saj si qendër rajonale për importin dhe shpërndarjen e gazit në Evropën Juglindore.
