Presidenti i Shteteve të Bashkuara të Amerikës, Donald Trump, ka paralajmëruar veprime të reja kundër Iranit përmes një postimi në rrjetin social Truth Social.
Në mesazhin e publikuar mëngjesin e së premtes, Trump përdori një gjuhë të ashpër ndaj regjimit iranian dhe la të kuptohet për zhvillime të mëdha ushtarake gjatë ditës.
“Shikoni çfarë do të ndodhë sot me këta të çmendur. Ata kanë vrarë njerëz të pafajshëm në mbarë botën për 47 vjet dhe tani unë, si presidenti i 47-të i Shteteve të Bashkuara të Amerikës, po i vras ata,” shkroi Trump në postimin e tij.
Pretendime për goditje ndaj forcave iraniane
Në të njëjtin mesazh, presidenti amerikan pretendoi se SHBA-ja po godet regjimin iranian në disa drejtime.
Sipas tij, forcat amerikane po e “shkatërrojnë plotësisht regjimin terrorist të Iranit, ushtarakisht, ekonomikisht dhe në çdo mënyrë tjetër”.
Trump shtoi gjithashtu se marina dhe forcat ajrore iraniane janë neutralizuar dhe se një pjesë e armatimeve, përfshirë raketa dhe dronë, janë shkatërruar, ndërsa udhëheqësit e regjimit – sipas tij – janë zhdukur.
Deklarata vjen në një moment të tensionuar në Lindjen e Mesme, ndërsa konflikti mes SHBA-së, Izraelit dhe Iranit vazhdon të përshkallëzohet.
