Kryeministri i Shqipërisë, Edi Rama, ka publikuar pamje ajrore nga koncerti i reperit me famë botërore Kanye West, i mbajtur mbrëmjen e së shtunës në Tiranë, duke e cilësuar ngjarjen si një investim me ndikim të madh për imazhin e vendit dhe ekonominë lokale.
Sipas Ramës, koncerti mblodhi në kryeqytetin shqiptar mijëra vizitorë nga 80 vende të botës, duke e shndërruar Tiranën në një qendër të rëndësishme të turizmit dhe argëtimit ndërkombëtar.
Pamjet e publikuara me dron tregojnë stadiumin e improvizuar, me kapacitet prej rreth 60 mijë spektatorësh, të mbushur plot gjatë performancës së artistit amerikan.
Në mesazhin e tij në rrjetet sociale, Rama theksoi se organizimi i një eventi të këtyre përmasave sjell përfitime që shkojnë përtej aspektit artistik.
“Mirëmëngjes dhe me videokartolinën e një mbrëmjeje magjike të Tiranës, ku dje 80 kombësi u bënë bashkë në koncertin kult të Kanye West, një investim i shkëlqyer jo thjesht për imazhin e Shqipërisë turistike, por edhe për impaktin pozitiv në ekonominë e kryeqytetit, ju uroj një të diel të bukur,” shkroi kryeministri.
Koncerti i Kanye West ka qenë një nga ngjarjet më të mëdha muzikore të organizuara ndonjëherë në Shqipëri, duke tërhequr mijëra turistë dhe vizitorë të huaj. Autoritetet shqiptare vlerësojnë se eventi ka pasur ndikim pozitiv në sektorët e hotelerisë, gastronomisë, transportit dhe shërbimeve, ndërsa e ka promovuar Shqipërinë si një destinacion të rëndësishëm për organizimin e eventeve ndërkombëtare.
