Avancimi i rebelëve drejt kryeqytetit
Rebelët sirianë po afrohen me shpejtësi drejt Damaskut, duke intensifikuar ofensivën kundër regjimit të presidentit Bashar al-Assad. Pas marrjes nën kontroll të qyteteve përreth kryeqytetit, ata pretendojnë se po rrethojnë Damaskun. Komandanti rebel Hasan Abdel Gani deklaroi se forcat e tij kanë nisur “fazën përfundimtare të rrethimit të kryeqytetit”.
Sipas Observatorit Sirian për të Drejtat e Njeriut me bazë në Londër, ushtria siriane është tërhequr nga disa vendbanime pranë Damaskut, përfshirë fshatin Artoz, rreth 10 kilometra nga kryeqyteti. Rebelët kanë rrethuar disa fshatra dhe po përpiqen të lirojnë të burgosurit nga një burg ushtarak pranë Damaskut.
Ministria siriane e Mbrojtjes ka mohuar tërheqjen e forcave nga pozicionet përreth kryeqytetit, duke theksuar se ushtria vazhdon të jetë e pranishme në të gjitha zonat strategjike.
Ofensiva shtrihet në jug dhe qendër të Sirisë
Rebelët kanë përparuar gjithashtu në provincën Dara dhe qytetin Quneitra, pranë Lartësisë së Golanit të aneksuar nga Izraeli. Ndërkohë, në Homs, ushtria siriane, me mbështetjen e forcave ajrore ruse, po përpiqet të ngadalësojë avancimin e rebelëve. Sulmet ajrore kanë shkaktuar të paktën shtatë viktima civile, sipas agjencive ndërkombëtare.
Përpjekje diplomatike për dialog
Ministrat e Jashtëm të Iranit, Turqisë dhe Rusisë u takuan në Doha, Katar, për të diskutuar mbi krizën siriane. Ata bënë thirrje për fillimin e një dialogu politik midis qeverisë së Assadit dhe opozitës. Ministri i Jashtëm iranian, Abbas Aragchi, theksoi nevojën për një zgjidhje politike, ndërsa homologu rus, Sergej Lavrov, paralajmëroi kundër rënies së territoreve siriane në duart e grupeve të quajtura terroriste.
Thirrje për tërheqjen e qytetarëve
Në mes të tensioneve, shumë vende po u bëjnë thirrje qytetarëve të tyre të largohen nga Siria. Jordania mbylli kufirin me Sirinë dhe kërkoi që shtetasit e saj të tërhiqen menjëherë. Edhe SHBA ka paralajmëruar qytetarët e saj për t’u larguar nga Siria për shkak të pasigurisë dhe përleshjeve të vazhdueshme në vend.
Sipas raporteve të gazetës The New York Times, Irani ka nisur tërheqjen e përfaqësuesve të tij, përfshirë komandantët ushtarakë dhe diplomatët. Edhe Kombet e Bashkuara po reduktojnë personelin e emergjencës, por premtojnë të vazhdojnë ndihmat për popullin sirian.
Asad mohon të jetë larguar nga Damasku
Zyra e Presidentit njoftoi se Bashar al-Assad vazhdon të kryejë detyrat e tij nga kryeqyteti, duke hedhur poshtë zërat se ai është larguar nga Damasku. Në një situatë ku lufta civile po përshkallëzohet, Siria mbetet në qendër të vëmendjes ndërkombëtare, duke përballuar presione ushtarake dhe diplomatike.
