Parlamenti i Shqipërisë rinis sot punimet, pas një ndërprerjeje të shkurtër për shkak të zgjedhjeve të përgjithshme të 11 majit. Seanca e sotme plenare, e para pas këtij procesi zgjedhor, do të mbahet në orën 12:00 dhe pritet të shënojë një rikthim të fortë të debatit politik në sallën e Kuvendit.
Në prag të kësaj seance, kryetari i Grupit Parlamentar të Partisë Demokratike, Gazment Bardhi, ka dërguar një mesazh mobilizues për deputetët e opozitës, duke e cilësuar pjesëmarrjen në këtë seancë si jetike për të denoncuar atë që ai e quan “farsë elektorale”.
“Të nderuar kolegë, nesër ora 12:00 është seanca plenare e Kuvendit, në të cilën do të marrim pjesë dhe do të bëjmë gjithçka për të paraqitur faktet e plota për farsën elektorale të 11 majit. Ju përshëndes!” – thuhet në mesazhin e Bardhit.
Nga ana tjetër, Partia Socialiste pritet të mblidhet në orën 11:30 në një takim të Grupit Parlamentar, një orë përpara nisjes së seancës. Në mesazhin e shpërndarë nga kreu i grupit socialist, Niko Peleshi, u kërkua pjesëmarrje e detyrueshme nga deputetët për të diskutuar organizimin e punës parlamentare në komisione dhe seancat në vijim.
“Diskutojmë mbarëvajtjen e veprimtarisë parlamentare në komisione dhe seanca përgjatë javëve në vazhdim. Pjesëmarrja është e domosdoshme”, shkruan Peleshi në komunikimin e tij.
Po ashtu, paraditen e sotme, Kryetarja e Kuvendit Elisa Spiropali ka thirrur Konferencën e Kryetarëve, ku pritet të shqyrtohet projektprogrami i punës së Kuvendit për periudhën 29 maj – 8 korrik 2025. Në rend dite janë edhe projektkalendari i punimeve për periudhën 29 maj – 18 qershor si dhe raporti i monitorimit për tremujorin e parë të vitit mbi zbatimin e rekomandimeve të Komisionit Evropian për vitin 2024.
Punimet e këtij legjislacioni do të vijojnë deri në fund të javës së tretë të korrikut, ndërsa në shtator pritet konstituimi i Parlamentit të ri. Seanca e sotme do të jetë një test për klimën politike pas zgjedhjeve dhe një tregues për ecurinë e debatit parlamentar në muajt e fundit të mandatit aktual.
