Sekretari amerikan i Shtetit, Marco Rubio, ka njoftuar përfundimin e operacionit ushtarak “Epic Rage” ndaj Iran, duke bërë të ditur se tashmë Shtetet e Bashkuara kanë hyrë në një fazë të re të quajtur “Project Freedom”.
Sipas tij, operacioni i ri ka për qëllim kryesor garantimin e lirisë së lundrimit dhe sigurimin e daljes së sigurt të anijeve nga Ngushtica e Hormuzit, një nga pikat më të ndjeshme strategjike në botë, e përfshirë nga tensionet e fundit në rajon.
Rubio theksoi se situata në terren mbetet e rëndë, duke bërë të ditur se rreth 10 detarë kanë humbur jetën si pasojë e përplasjeve në këtë zonë. Ai e përshkroi gjendjen si kritike, sidomos për civilët që ndodhen në det.
“Project Freedom” është konceptuar si një operacion mbrojtës, që synon jo vetëm mbrojtjen e korridoreve detare, por edhe shpëtimin e mijëra civilëve të bllokuar në Gjirin Persik, të ardhur nga vende të ndryshme të botës.
Sekretari amerikan shtoi se SHBA do të vazhdojë të garantojë lirinë e lundrimit dhe do të ndërhyjë vetëm në rast se forcat e saj sulmohen, duke nënvizuar se disa mjete lundruese iraniane janë shkatërruar gjatë operacioneve të fundit.
Në të njëjtën kohë, Rubio i bëri thirrje Teheranit që të rikthehet në tryezën e negociatave për të gjetur një zgjidhje diplomatike të krizës. Ai preku gjithashtu zhvillime të tjera ndërkombëtare, përfshirë situatën në Liban, Kubë dhe bashkëpunimin me Vatikanin në fushën e lirisë fetare.
