Sekretari amerikan i Shtetit, Marco Rubio, ka deklaruar se plani i administratës së presidentit Donald Trump për përfundimin e luftës në Gaza nuk parashikon vendosjen e kontrollit izraelit mbi 70 për qind të territorit të Rripit të Gazës.
Duke folur gjatë një seance dëgjimore në Kongres, Rubio sqaroi se objektivi i kryeministrit izraelit Benjamin Netanyahu për marrjen nën kontroll të një pjese të madhe të Gazës nuk është pjesë e planit amerikan për zgjidhjen e konfliktit.
Deklarata erdhi pasi kongresistja Rosa DeLauro kërkoi sqarime mbi qëndrimin e Uashingtonit ndaj synimeve të shpallura nga qeveria izraelite për zgjerimin e kontrollit në territorin palestinez.
“Hamasi nuk duhet të qeverisë më Gazën”
Sipas Rubios, plani i administratës Trump synon t’i japë fund sundimit të Hamasi në Gaza dhe të krijojë kushtet për një administrim të ri pas përfundimit të luftimeve.
“Ne kemi një plan dhe ai nuk parashikon diçka të tillë”, tha Rubio, duke iu referuar mundësisë së kontrollit izraelit mbi 70 për qind të territorit të Gazës.
Ai theksoi se objektivi i SHBA-së është që territori të administrohet nga një autoritet që nuk ka lidhje me Hamasin.
“Në fund të fundit, ne e kuptojmë se ajo që dëshirojmë ne dhe, besoj, ajo që do të dëshironin përfundimisht edhe izraelitët, është një Gaza që të qeveriset nga një autoritet që nuk është Hamasi”, deklaroi kreu i diplomacisë amerikane.
Plani amerikan synon fazën pas luftës
Sipas Rubios, propozimi i administratës Trump fokusohet në përfundimin e konfliktit, largimin e Hamasit nga pushteti dhe krijimin e një strukture të re qeverisëse që do të mundësonte stabilizimin dhe rindërtimin e territorit.
Deklaratat e tij vijnë në një kohë kur vazhdojnë diskutimet ndërkombëtare mbi të ardhmen e Gazës pas luftës dhe mbi modelin e administrimit që do të mund të zëvendësonte qeverisjen aktuale të Hamasit.
Ndërkohë, qëndrimet e Uashingtonit dhe Tel Avivit mbi fazën pas konfliktit mbeten një nga temat kryesore të debatit diplomatik në Lindjen e Mesme.
