Dita e dytë e samitit të Bashkimit Evropian në Këshillin Evropian ka nisur me tensione të qarta politike, teksa udhëheqësit përballen me një nga debatet më të ashpra të viteve të fundit: buxhetin afatgjatë të bllokut.
Buxheti i propozuar nga Komisioni Evropian, me vlerë rreth 2 trilionë euro, ka hapur një betejë të drejtpërdrejtë mes shteteve anëtare, ku dallimet po thellohen në vend që të zbuten.
Sipas propozimeve të presidencës së rradhës së BE-së Bashkimi Evropian, është diskutuar një ulje e “moderuar” prej rreth 2%, që përkthehet në rreth 32.8 miliardë euro nga drafti fillestar. Por kjo qasje po shihet në mënyra krejt të ndryshme nga kampet brenda Unionit.
Shtetet që mbrojnë bujqësinë dhe fondet e kohezionit e konsiderojnë këtë kompromis të mjaftueshëm, ndërsa grupi i vendeve më kursimtare — tashmë të vetëquajtura “modernizuese” — e konsideron të pamjaftueshëm çdo ulje të tillë.
Debatet pritet të ashpërsohen edhe më tej gjatë ditës, me liderët evropianë që po forcojnë pozicionet e tyre dhe po vendosin “vija të kuqe” të reja në negociata.
Megjithatë, pavarësisht ndarjeve të thella, qëllimi zyrtar mbetet i pandryshuar: arritja e një marrëveshjeje përfundimtare mbi buxhetin deri në fund të vitit.
