Sot, nga ora 15:00, do të mbahet vazhdimi i katërt i seancës konstituive të Kuvendit të Kosovës. Lëvizja Vetëvendosje (LVV) do të vazhdojë përpjekjen për të propozuar emrin e deputetes Albulena Haxhiu për kryeparlamentare. Megjithatë, emri i Haxhiut u refuzua të shtunën e kaluar, pasi ajo mori vetëm 57 vota, ndonëse LVV e ka propozuar për herë të katërt.
Tri përpjekjet e mëparshme për konstituim të Kuvendit kanë dështuar në pikën e parë të rendit të ditës, për shkak të mosmiratimit të mandatit të deputetëve. Deputetët e PDK-së, LDK-së dhe AAK-së votuan kundër raportit të Komisionit të Përkohshëm të cilin e paraqiti LVV.
Seanca e enjtes u ndërpre pa u trajtuar asnjë pikë e rendit të ditës, për shkak të mungesës së koordinimit mes grupeve parlamentare. Megjithatë, të shtunën, raporti u miratua me vota unanime pas një takimi para seancës mes përfaqësuesve politikë, të ftuar nga kryesuesi i seancës, Avni Dehari.
Pas miratimit të raportit, deputetët bënë betimin. Kryesuesi Dehari e lexoi tekstin, dhe ligjvënësit e dhanë betimin, përveç atyre të Listës Serbe, të cilët refuzuan të thonë “betohem.” Deputeti i LVV-së, Dimal Basha, kërkoi që mandatet e deputetëve të Listës Serbe të mos priteshin.
Ndërkohë, bllokada e re erdhi kur erdhi koha për zgjedhjen e kryetarit të Kuvendit. LVV bëri propozimin, por Albulena Haxhiu mori 57 vota për, përfshirë 48 deputetë të LVV-së dhe 9 të komuniteteve. Kundër votuan 20 deputetë të LDK-së, ndërsa 3 deputetë të Nismës abstenuan. Deputetët e PDK-së, Listës Serbe, Duda Balje dhe Adem Hoxha nuk morën pjesë në votim.
