Pas takimit shtatëorësh të së dielës me drejtuesit politikë të Partisë Socialiste në 12 qarqet e vendit dhe krerët e komisioneve parlamentare, kryeministri Edi Rama do të mbledhë këtë të hënë ministrat e kabinetit qeveritar në Pogradec.
Takimi, i konceptuar si një “retreat” qeveritar, do të fokusohet te bilanci i punës së deritanishme, por edhe te objektivat dhe prioritetet e qeverisë për vitin e dytë të mandatit të katërt.
Rama i ka zhvilluar takime të tilla në nisje të sezonit të ri politik, pas përfundimit të pushimeve verore, duke i përdorur ato për të analizuar performancën e kabinetit dhe për të përcaktuar drejtimet e punës për muajt në vijim.
Mbledhja e ministrave vjen një ditë pas takimit me strukturat drejtuese të PS-së, ku në fokus ishin edhe dy dokumentet e prezantuara nga Rama në fund të korrikut, “Besa” dhe “Prania Besnike”, të cilat synojnë të përcaktojnë një qasje të re të Partisë Socialiste në mandatin e katërt, me theks te shqetësimet dhe problematikat e qytetarëve.
Një tjetër pikë e rëndësishme ishte platforma “Pasqyrë Albania”, përmes së cilës qeveria synon të evidentojë dhe ndjekë në kohë reale shqetësimet e qytetarëve.
Asambleja e PS-së pritet në shtator
Pas takimeve në Pogradec, në ditët e para të shtatorit pritet të mblidhet edhe Asambleja e Partisë Socialiste.
Mbledhja e këtij forumi merr rëndësi të veçantë pasi Rama e ka përdorur në të kaluarën Asamblenë për të paralajmëruar ose bërë ndryshime në përbërjen e qeverisë.
Kjo fazë e re politike vjen pas një sezoni të vështirë për qeverinë, të shoqëruar edhe me një protestë që zgjati rreth tre muaj para Kryeministrisë.
Takimet e Pogradecit pritet të shërbejnë kështu si pikënisje për sezonin e ri politik, ndërsa vëmendja do të jetë te performanca e ministrave dhe çdo ndryshim i mundshëm në kabinet gjatë vjeshtës.
