Shtetet e Bashkuara të Amerikës dhe Irani duket se po afrohen drejt një marrëveshjeje diplomatike që mund të ulë ndjeshëm tensionet në Lindjen e Mesme, pas javësh përplasje ushtarake dhe kërcënimesh reciproke.
Sipas mediave amerikane, përfshirë Axios, ekipet negociatore kanë rënë dakord mbi një memorandum mirëkuptimi që parashikon armëpushim 60-ditor dhe nisjen e negociatave për programin bërthamor iranian. Megjithatë, marrëveshja ende nuk është finalizuar, pasi presidenti Donald Trump nuk ka dhënë ende miratimin përfundimtar.
Raportimet e i24NEWS sugjerojnë se drafti është dakordësuar në nivel teknik, por pengesë mbetet mungesa e aprovimit nga Mojtaba Khamenei, djali i liderit suprem iranian.
Çfarë përmban drafti i marrëveshjes?
Sipas informacioneve të publikuara, memorandumi përfshin katër pika kryesore:
- Armëpushim 60-ditor mes palëve;
- Lundrim të lirë në Ngushtica e Hormuzit pa pengesa apo tarifa;
- Heqje graduale të bllokadës detare amerikane;
- Angazhim të Iranit për të mos zhvilluar armë bërthamore.
Po ashtu, dokumenti përmend diskutime për lehtësimin e sanksioneve amerikane dhe lirimin e fondeve iraniane të ngrira, si dhe krijimin e një mekanizmi për ndihma humanitare dhe furnizime tregtare drejt Iranit.
Ky zhvillim vjen në një moment jashtëzakonisht të tensionuar, pasi ditët e fundit SHBA kreu sulme pranë Bandar Abbas, ndërsa Irani reagoi me sulm ndaj një baze ajrore amerikane që besohet të ndodhet në Kuvajti.
Administrata amerikane i ka cilësuar goditjet si “mbrojtëse”, duke pretenduar se objektivat iraniane përbënin kërcënim për trupat amerikane dhe për sigurinë e lundrimit tregtar në Gjirin Persik.
Sipas Axios, ky memorandum konsiderohet përparimi më serioz diplomatik që nga nisja e përshkallëzimit ushtarak mes dy vendeve, ndonëse një marrëveshje gjithëpërfshirëse për programin bërthamor iranian pritet të kërkojë negociata të gjata dhe të ndërlikuara.
