Forcat amerikane kanë goditur pesë anije cisterna iraniane gjatë së martës, duke fundosur njërën prej tyre, në përgjigje të sulmeve të Iranit ndaj një anijeje luftarake amerikane, njoftoi Komanda Qendrore e SHBA-së (CENTCOM).
Sipas CENTCOM-it, katër cisterna iraniane të naftës në Gjirin e Omanit, të lidhura me Korpusin e Gardës Revolucionare të Iranit (IRGC), u vunë në shënjestër. Një tjetër cisternë u godit pranë ishullit Kharg, një zonë e rëndësishme për eksportin e naftës në brigjet e Iranit.
Përshkallëzimi erdhi pasi Teherani u kundërpërgjigj me sulme ndaj objektivave amerikane. Irani lëshoi raketa drejt një baze amerikane në Jordani, ndërsa gjithashtu sulmoi dy anije amerikane dhe tetë cisterna nafte në Ngushticën e Hormuzit.
Jordania njoftoi se kishte rrëzuar 18 nga 20 raketat iraniane të lëshuara drejt territorit të saj. Dy raketat e tjera ranë në zona të pabanuara, sipas raportimeve të BBC-së.
Përplasjet mes SHBA-së dhe Iranit janë përshkallëzuar gjatë javës së fundit, më shumë se gjashtë muaj pasi Shtetet e Bashkuara dhe Izraeli nisën sulmet ndaj Iranit më 28 shkurt.
Zhvillimet e fundit kanë rritur ndjeshëm tensionet në rajon, veçanërisht në Gjirin e Omanit dhe Ngushticën e Hormuzit, një prej rrugëve kryesore për transportin global të naftës.
