Shtetet e Bashkuara kanë njoftuar se planifikojnë t’i ofrojnë qeverisë së re të Kolumbisë një paketë ndihme prej 1 miliard dollarësh, e dedikuar për çështjet e sigurisë dhe forcimin e bashkëpunimit mes dy vendeve.
Njoftimi është bërë në ditën e betimit të presidentit të ri kolumbian, Abelardo de la Espriella, ndërsa Departamenti Amerikan i Shtetit (DASH) ka deklaruar se paketa synon të mbështesë administratën e re në përmbushjen e objektivave të përbashkëta mes Uashingtonit dhe Bogotás.
Sipas DASH-it, marrëdhëniet mes Shteteve të Bashkuara dhe Kolumbisë po hyjnë në një fazë të re, me fokus në sigurinë dhe bashkëpunimin ekonomik.
Departamenti i Shtetit e ka përshkruar këtë zhvillim si një “rigjallërim” të marrëdhënieve dypalëshe, duke nënvizuar synimin për thellimin e bashkëpunimit në sektorin e sigurisë.
Presidenti 48-vjeçar Abelardo de la Espriella kishte marrë mbështetjen e presidentit amerikan Donald Trump gjatë fushatës presidenciale në Kolumbi.
De la Espriella është zotuar se do të ndjekë një politikë të ashpër ndaj grupeve të armatosura dhe trafikut të drogës, duke premtuar intensifikimin e operacioneve kundër grupeve guerrilase dhe karteleve të drogës që veprojnë në territorin kolumbian.
Paketa e paralajmëruar nga Uashingtoni pritet të shërbejë si një nga shtyllat kryesore të bashkëpunimit të ri në fushën e sigurisë, veçanërisht në luftën kundër krimit të organizuar dhe trafikut ndërkombëtar të drogës.