Shtetet e Bashkuara të Amerikës kanë paralajmëruar Iranin se mbeten plotësisht të përgatitura për rifillimin e operacioneve ushtarake nëse situata e kërkon, ndërsa tensionet mes dy vendeve vazhdojnë të mbeten të larta pavarësisht përpjekjeve diplomatike për një marrëveshje.
Sekretari amerikan i Mbrojtjes, Pete Hegseth, gjatë forumit ndërkombëtar të sigurisë Shangri-La Dialogue, deklaroi se ushtria amerikane disponon kapacitetet dhe burimet e nevojshme për t’iu përgjigjur çdo kërcënimi nga Teherani.
“Jemi plotësisht të aftë të rifillojmë operacionet ushtarake nëse kjo kërkohet”, tha Hegseth, duke theksuar se objektivi kryesor i Uashingtonit mbetet parandalimi i pajisjes së Iranit me armë bërthamore.
Deklaratat e tij vijnë vetëm një ditë pasi presidenti amerikan Donald Trump zhvilloi konsultime me ekipin e sigurisë kombëtare lidhur me mundësinë e arritjes së një marrëveshjeje me Iranin.
Sipas një zyrtari të lartë të Shtëpisë së Bardhë, Trump nuk do të japë miratimin për asnjë marrëveshje që nuk garanton se Irani nuk do të zhvillojë armë bërthamore.
“Presidenti Trump do të nënshkruajë një marrëveshje vetëm nëse ajo është në interes të Amerikës dhe respekton vijat e tij të kuqe. Irani nuk mund të ketë armë bërthamore”, citohet të ketë deklaruar zyrtari.
Paralajmërim edhe për Kinën
Gjatë fjalimit në Singapor, Hegseth shprehu shqetësim edhe për rritjen e fuqisë ushtarake të Kina, duke e cilësuar zgjerimin e kapaciteteve të saj ushtarake si një zhvillim që kërkon vëmendje të veçantë nga aleatët e SHBA-së në rajonin Azi-Paqësor.
Ai theksoi se Uashingtoni synon ruajtjen e një balanci të qëndrueshëm forcash në rajon dhe nuk dëshiron që asnjë shtet të fitojë një pozicion dominues.
“Ne synojmë një ekuilibër të favorshëm dhe të qëndrueshëm të forcave, ku asnjë shtet, përfshirë Kinën, të mos jetë në gjendje të imponojë hegjemoninë e tij apo të kërcënojë sigurinë dhe mirëqenien e vendit tonë dhe aleatëve tanë”, deklaroi kreu i Pentagonit.
Deklaratat e zyrtarëve amerikanë vijnë në një periudhë delikate për diplomacinë ndërkombëtare, teksa vazhdojnë përpjekjet për të arritur një marrëveshje të re mes Uashingtonit dhe Teheranit mbi programin bërthamor iranian, ndërsa paralelisht po rriten shqetësimet për rivalitetin strategjik mes SHBA-së dhe Kinës në Azi.
