Pas një seance maratonë që zgjati rreth 14 orë, Kuvendi i Shqipërisë ka miratuar në parim Projektbuxhetin për vitin 2027, me 80 vota pro dhe 25 kundër. Mbështetja erdhi nga mazhoranca socialiste, ndërsa opozita kundërshtoi projektbuxhetin dhe ndryshimet e propozuara në paketën fiskale.
Seanca parlamentare, e zhvilluar të mërkurën, më 18 nëntor, u karakterizua nga debate të ashpra ndërmjet përfaqësuesve të mazhorancës dhe opozitës lidhur me shpërndarjen e fondeve publike, politikat tatimore dhe ndikimin e tyre në ekonominë e vendit.
Projektbuxheti për vitin 2027 parashikon shpenzime publike prej rreth 10 miliardë eurosh, të cilat, sipas qeverisë, synojnë rritjen e investimeve, mbështetjen sociale dhe financimin e sektorëve prioritarë.
Miratohet edhe paketa fiskale për vitin 2027
Krahas projektbuxhetit, deputetët votuan në parim edhe disa projektligje që përbëjnë paketën fiskale të vitit të ardhshëm.
Ndryshimet në ligjin për tatimin mbi të ardhurat u miratuan me 80 vota pro dhe 25 kundër, ndërsa ndryshimet në ligjin për Tatimin mbi Vlerën e Shtuar (TVSH) morën 80 vota pro dhe 24 kundër.
Me 80 vota pro dhe 24 kundër u miratuan edhe ndryshimet në ligjin për procedurat tatimore, ndërsa ato për akcizat morën 80 vota pro dhe 25 kundër.
Projektligji për strehimin social u miratua me 79 vota pro, 25 kundër dhe një abstenim.
Opozita kundërshton politikat fiskale dhe shpërndarjen e fondeve
Gjatë debatit parlamentar, deputetët e opozitës ngritën shqetësime për ndikimin e ndryshimeve tatimore te bizneset dhe qytetarët.
Deputeti Eno Bozdo kritikoi mungesën e konsultimeve me përfaqësuesit e biznesit, veçanërisht për propozimin që parashikon uljen e pragut të TVSH-së në pesë milionë lekë.
Sipas tij, kjo masë mund të përfshijë rreth tetë mijë biznese të tjera në detyrimet e TVSH-së, duke rritur ngarkesën administrative dhe fiskale.
Bozdo kërkoi gjithashtu më shumë transparencë për listën e produkteve ushqimore që parashikohet të përfitojnë nga norma e reduktuar e TVSH-së prej 6 për qind.
Deputetja Jorida Tabaku vuri në dyshim efektivitetin e shpenzimeve publike, duke kritikuar nivelin e realizimit të investimeve dhe mënyrën e administrimit të fondeve buxhetore.
Qeveria: Buxheti synon mirëqenie sociale dhe stabilitet ekonomik
Nga ana tjetër, përfaqësuesit e mazhorancës e cilësuan projektbuxhetin si një instrument të rëndësishëm për zhvillimin ekonomik dhe përmbushjen e objektivave të integrimit evropian.
Ministri i Financave, Petrit Malaj, deklaroi se projektbuxheti mbështetet në tri shtylla kryesore: mirëqenien sociale, stabilitetin fiskal dhe investimet që lidhen me zhvillimin dhe procesin e integrimit në Bashkimin Evropian.
Sipas tij, buxheti i vitit 2027 parashikon mbështetje më të madhe për bujqësinë, arsimin, mbrojtjen dhe sigurinë kombëtare.
Kreu i Grupit Parlamentar të Partisë Socialiste, Taulant Balla, u bëri thirrje deputetëve të opozitës që ta mbështesin projektbuxhetin.
Braçe kritikon mosrealizimin e shpenzimeve nga ministritë
Gjatë diskutimeve, kritika pati edhe nga deputeti socialist Erion Braçe, i cili ngriti shqetësimin për mosrealizimin e shpenzimeve të planifikuara nga institucionet qeveritare.
Braçe kërkoi përgjegjësi më të madhe nga ministrat për administrimin e fondeve publike, duke theksuar se drejtuesit që rrezikojnë realizimin e buxhetit duhet të mbajnë përgjegjësi politike.
Ai nënvizoi rëndësinë e përdorimit efektiv të parasë publike dhe shmangies së keqmenaxhimit.
Projektbuxheti rikthehet në komisione parlamentare
Pas miratimit në parim, Projektbuxheti 2027 do të rikthehet në komisionet parlamentare për shqyrtim të hollësishëm, nen për nen.
Gjatë kësaj faze mund të shqyrtohen edhe propozimet për ndryshime që vijnë nga deputetët, institucionet dhe grupet e interesit.
Pas përfundimit të procedurave në komisione, projektbuxheti do të rikthehet në seancë plenare për votimin përfundimtar.
Seanca e së mërkurës u shoqërua edhe me një ndërprerje të shkurtër të energjisë elektrike në sallën e Kuvendit, gjatë së cilës deputetët e opozitës kërkuan dorëheqjen e kryeministrit Edi Rama.
