Ministria e Brendshme e Shqipërisë ka shpallur persona të padëshiruar (non grata) dy shtetas shqiptarë nga Maqedonia e Veriut, të cilët, sipas autoriteteve, dyshohet se kanë zhvilluar veprimtari që cenojnë sigurinë kombëtare dhe rendin kushtetues të Shqipërisë.
Me urdhër të ministrit të Brendshëm, Besfort Lamallari, imami Bekir Halimi dhe analisti e ish-politikani Valon Bela janë ndaluar të hyjnë ose të kalojnë tranzit në territorin shqiptar për një periudhë 10-vjeçare, deri në vitin 2036.
Sipas burimeve, propozimi për shpalljen e tyre “non grata” është bërë nga Drejtoria e Antiterrorit në Policinë e Shtetit, pas grumbullimit të informacioneve mbi veprimtarinë e tyre. Vendimi është zbatuar më pas me urdhër të Ministrisë së Brendshme dhe u është përcjellë Policisë së Shtetit dhe Policisë Kufitare për zbatim.
Vendimi bazohet në Ligjin për të Huajt
Vendimi mbështetet në nenin 104 të Ligjit “Për të Huajt”, i cili i jep Ministrit të Brendshëm kompetencën të shpallë person të padëshiruar çdo shtetas të huaj që, për interesa të rëndësishme të shtetit, vepron ose propagandon kundër sovranitetit, sigurisë kombëtare, rendit kushtetues apo rendit publik, si dhe në rastet kur lidhet me organizata terroriste ose mbështet veprimtari kundër shtetit ligjor.
Kush janë Bekir Halimi dhe Valon Bela?
Bekir Halimi është imam në Shkup dhe një figurë e njohur në Maqedoninë e Veriut. Ai u përjashtua nga Bashkësia Fetare Islame në vitin 2016 pas mosmarrëveshjeve me drejtuesit e institucionit.
Ndërkaq, Valon Bela është analist politik dhe ish-aktivist në Maqedoninë e Veriut, i njohur për komentet e tij mbi zhvillimet politike në rajon dhe për angazhimin e mëparshëm në politikë.
Pas publikimit të vendimit, Bela reagoi në rrjetet sociale duke pretenduar se vendimi është marrë “në sinkron” mes kryeministrit shqiptar Edi Rama dhe presidentit serb Aleksandar Vuçiq.
Ende pa sqarime për arsyet konkrete
Deri më tani, autoritetet shqiptare nuk kanë bërë publike veprimtaritë konkrete që kanë çuar në shpalljen “non grata” të dy shtetasve, duke u kufizuar në arsyetimin se vendimi lidhet me mbrojtjen e sigurisë kombëtare dhe rendit kushtetues.
Rasti i dytë brenda pak javësh
Ky është rasti i dytë brenda një periudhe të shkurtër që Ministria e Brendshme përdor mekanizmin e shpalljes “non grata” për arsye të sigurisë kombëtare.
Më 25 qershor, autoritetet shqiptare shpallën person të padëshiruar edhe Ikballe Huduti, shtetase nga Kosova, duke i ndaluar hyrjen në Shqipëri për 15 vjet. Sipas Ministrisë së Brendshme, masa u mor për shkak të lidhjeve të saj të dyshuara me regjimin iranian dhe veprimtarive që, sipas autoriteteve, cenonin rendin kushtetues të vendit.
