Kombëtarja shqiptare do të zbresë në fushë sonte ndaj Letonisë me objektivin e qartë për të mbajtur gjallë ëndrrën e kualifikimit në Kupën e Botës. Por, përballja e orës 20:45 vjen me disa lëvizje në listën zyrtare të skuadrës.
Sipas burimeve të Panorama Sport, trajneri Silvinjo ka vendosur që Mario Dajsinani, Medon Berisha dhe Adrion Pajaziti të mos jenë pjesë e 23-shes zyrtare për këtë sfidë, duke i lënë jashtë formacionit dhe në tribunë.
Vendimi vjen pas nevojës për të reduktuar listën prej 27 lojtarësh në 23 emra, siç e kërkojnë rregullat e UEFA-s për ndeshjet zyrtare.
Bajrami rikthehet, Gjimshiti mungon
Në ndryshim nga ndeshja e fundit ndaj Serbisë, Adrian Bajrami rikthehet në listën e grumbulluar për shkak të mungesës së Berat Gjimshitit, i cili është i pezulluar për shkak të kartonit të verdhë të marrë në ndeshjen e kaluar.
Ndërkohë, Dajsinani, Berisha dhe Pajaziti nuk janë përfshirë as në sfidën e zhvilluar tri ditë më parë në stadiumin “Air Albania”, duke treguar se ata momentalisht nuk janë pjesë e planeve prioritare të trajnerit brazilian për ndeshjet vendimtare.
Ndeshja e vendimeve të mëdha
Shqipëria kërkon me ngulm tri pikët për të mbajtur gjallë shpresat për një kualifikim historik në Kampionatin Botëror “2026”. Ndeshja ndaj Letonisë konsiderohet vendimtare në rrugëtimin kuqezi dhe pritet me interes të madh nga tifozët.
Përballja do të luhet në orën 20:45, ndërsa stadiumi është parashikuar të jetë i mbushur me tifozë që synojnë ta shtyjnë Kombëtaren drejt një tjetër fitoreje.
