Tetë persona janë akuzuar për korrupsion, pastrim parash dhe pjesëmarrje në një organizatë kriminale në një hetim të profilit të lartë që përfshin ryshfet në Parlamentin Evropian. Prokuroria belge njoftoi të premten se hetimi lidhet me përfitime të mundshme për gjigantin kinez të teknologjisë, Huawei.
Sipas autoriteteve belge, më 13 mars janë kryer kontrolle në 21 lokacione të ndryshme në Belgjikë dhe Portugali. Si pjesë e hetimeve, një gjykatës ka urdhëruar që të vulosen zyrat e dy ndihmësve parlamentarë.
Hetuesit besojnë se skema e korrupsionit ka nisur që nga viti 2021 dhe është zhvilluar në mënyrë të sofistikuar, duke u maskuar si lobim komercial. Dyshohet se janë kryer pagesa për të ndikuar në pozicionet politike, si dhe janë dhuruar përfitime të tjera si ushqim, shpenzime udhëtimi dhe bileta për ndeshje futbolli.
Në qendër të dyshimeve është Huawei, e cila pretendohet se ka përfituar nga këto veprime të paligjshme. Kompania kineze ka reaguar duke thënë se i trajton me seriozitet akuzat dhe është në komunikim me autoritetet për të kuptuar plotësisht situatën. Huawei ka theksuar se zbaton një politikë “zero tolerance” ndaj korrupsionit dhe çdo forme tjetër keqbërjeje.
Hetimet janë ende në zhvillim dhe autoritetet nuk kanë dhënë detaje shtesë për identitetin e të dyshuarve, ndërsa pritet që të dalin në dritë informacione të mëtejshme në ditët në vijim.
