Emisari i Bashkimit Evropian për dialogun Kosovë–Serbi, Peter Sørensen, ka deklaruar se zbatimi i detyrimeve që burojnë nga Marrëveshja për Rrugën drejt Normalizimit dhe Aneksi i Zbatimit mbetet dukshëm prapa zotimeve të marra nga Kosova dhe Serbia.
Në një intervistë për Gazetën Express, Sorensen theksoi se marrëveshjet janë ligjërisht të detyrueshme dhe se zbatimi i tyre nuk është çështje zgjedhjeje.
“Zbatimi nuk është në nivelin ku duhet të jetë. Dhe zbatimi nuk është ‘opsional’. Të dyja palët e dinë këtë; BE-ja dhe shtetet anëtare e kanë thënë këtë shumë herë”, deklaroi ai.
“Asnjëra palë nuk duhet të presë tjetrën”
Sipas emisarit evropian, nuk është me rëndësi se cila palë e bën hapin e parë, pasi të dyja kanë detyrime që duhet t’i përmbushin pa vonesa.
“Nuk bëhet fjalë për atë se kush e bën lëvizjen e parë. Asnjëra palë nuk ka nevojë të presë tjetrën”, u shpreh Sorensen.
Ai shtoi se për Kosovën, Aneksi i Zbatimit përcakton qartë obligimet që rrjedhin nga neni 7, ndërsa Serbia vazhdon të ketë detyrime të papërmbushura, përfshirë moskundërshtimin e anëtarësimit të Kosovës në organizata ndërkombëtare dhe pranimin e dokumenteve dhe simboleve shtetërore të Kosovës.
“Detyrimet e Serbisë qëndrojnë paralelisht. Të dyja janë njësoj të vonuara”, tha ai.
Marrëveshja mbetet në fuqi
Sorensen theksoi se kalimi i kohës nuk i ndryshon obligimet e marra nga palët.
“Marrëveshja e vitit 2023 dhe Aneksi i saj mbeten në fuqi. Ato janë ligjërisht të detyrueshme për të dyja palët. Kalimi i kohës nuk ndryshon asgjë”, deklaroi ai.
Takim i ri vetëm nëse priten rezultate
Duke folur për mundësinë e një takimi të ri në nivel të lartë ndërmjet Kosovës dhe Serbisë, Sorensen tha se një takim i tillë do të organizohet vetëm nëse ekzistojnë kushte për arritjen e rezultateve konkrete.
“Një takim i nivelit të lartë nuk është shpërblim dhe as mundësi për fotografi. Ai thirret kur mund të ndihmojë në arritjen e ndonjë rezultati”, theksoi ai.
Në fund, emisari evropian nënvizoi se, pavarësisht angazhimit të Bashkimit Evropian dhe të Përfaqësueses së Lartë për Politikë të Jashtme, Kaja Kallas, zbatimi i marrëveshjeve mbetet përgjegjësi ekskluzive e Kosovës dhe Serbisë.
“Asnjë aktor i jashtëm nuk mund t’i zbatojë këto marrëveshje në emër të tyre. Këtë mund ta bëjnë vetëm Beogradi dhe Prishtina”, përfundoi Sorensen.
