Një operacion i përbashkët mes Strukturës së Posaçme Kundër Korrupsionit dhe Krimit të Organizuar (SPAK) dhe autoriteteve finlandeze ka çuar në goditjen e katër grupeve kriminale që vepronin në trafikun ndërkombëtar të lëndëve narkotike, kryesisht në territorin e Finlandës. Lajmi është bërë i ditur sot nga kreu i SPAK, Altin Dumani, gjatë një deklarate për shtyp.
Sipas Dumanit, këto grupe kishin një strukturë të mirëorganizuar dhe aktivitet afatgjatë, ndërsa organizatorët kryesorë ndodheshin në Shqipëri, prej nga drejtonin rrjetin e shpërndarjes së drogës.
“Ajo që vihet re është se aktiviteti i këtyre grupeve është i shtrirë në vite. Organizatorët qëndronin në Shqipëri dhe nga këtu udhëhiqnin aktivitetin kriminal,” deklaroi Dumani.
Gjatë operacionit janë lëshuar 11 masa sigurie, 10 prej të cilave në territorin shqiptar. Në total janë proceduar 54 persona, shumë prej të cilëve janë dënuar më parë nga drejtësia finlandeze. Lista përfshin shtetas shqiptarë, finlandezë dhe persona me kombësi të tjera.
Një nga aspektet më shqetësuese të këtij operacioni, sipas Dumanit, është përfshirja e këtyre grupeve për herë të parë në trafikun e drogës sintetike.
“Po përballemi për herë të parë me grupe kriminale që kanë në fokus të tyre drogën sintetike. Janë sekuestruar sasi të mëdha, përfshirë ekstazi – një substancë me rrezik të lartë,” theksoi ai.
Nga hetimet ka rezultuar se grupet kishin krijuar baza të qëndrueshme në Finlandë, ku herë pas here dërgonin përfaqësues nga Shqipëria për të menaxhuar shitjen e lëndëve narkotike në tregun lokal.
Operacioni i fundit konfirmon trendin në rritje të përfshirjes së grupeve kriminale shqiptare në trafikun e drogës sintetike në Evropën Veriore dhe rëndësinë e bashkëpunimit ndërkombëtar në luftën kundër krimit të organizuar.
