Agjencia Holandeze e Inteligjencës Ushtarake (MIVD) ka bërë të ditur se Rusia ka ndërmarrë një sulm të drejtpërdrejtë kibernetik ndaj një objekti publik në Holandë, në një përpjekje për të destabilizuar vendin dhe për të kërcënuar infrastrukturën kritike. Lajmi u bë i ditur në raportin vjetor të publikuar këtë javë.
Sipas raportit, sulmi ndodhi vitin e kaluar dhe kishte në shënjestër sistemin e kontrollit dixhital të një objekti publik, i cili për arsye sigurie nuk është identifikuar. MIVD konfirmoi se ky është rasti i parë i njohur i një sulmi të tillë sabotazhi nga Rusia në territorin holandez. Fatmirësisht, përpjekja për të marrë kontrollin e sistemit u parandalua me sukses.
“Me sa dimë, kjo është hera e parë që një sulm sabotazhi i këtij lloji është realizuar kundër një sistemi të kontrollit dixhital në Holandë,” deklaroi drejtori i MIVD, Peter Reesink. Ai shtoi se kërcënimi rus ndaj Evropës është në rritje, madje edhe nëse lufta në Ukrainë do të përfundonte.
Raporti thekson se Holanda mbetet një objektiv i rëndësishëm për Rusinë për shkak të mbështetjes së vazhdueshme që i jep Ukrainës. Vetëm javën e kaluar, Ministri holandez i Mbrojtjes, Ruben Brekelmans, njoftoi një paketë prej 150 milionë eurosh për mbrojtjen ajrore të Ukrainës.
MIVD paralajmëroi gjithashtu për aktivitete sabotuese të njësive ruse në Detin e Veriut, duke përfshirë hartimin e infrastrukturës dhe ndërhyrjet në kabllot nënujore të internetit, furnizimet me ujë dhe energji, që shërbejnë si elementë kritikë për sigurinë e rajonit.
Në të njëjtin raport, përmendet edhe Kina si një burim serioz kërcënimi për Evropën, jo vetëm për mbështetjen ndaj Moskës, por edhe përmes aktiviteteve të saj të sofistikuara të spiunazhit kibernetik.
