Rusia ka ndërmarrë sulmin më të rëndë ndaj Ukrainës që nga fillimi i këtij viti, duke lënë të paktën 17 persona të vrarë dhe mbi 100 të plagosur pas një vale masive bombardimesh në disa qytete të vendit.
Sipas raportimeve nga autoritetet ukrainase, forcat ruse përdorën një arsenal të gjerë, përfshirë 19 raketa balistike, 25 raketa kruiz dhe plot 659 dronë, duke e kthyer natën në një ofensivë të koordinuar në shkallë të gjerë.
Një nga goditjet më të rënda u regjistrua në qytetin Çernihiv, ku u shënjestrua infrastruktura kritike. Si pasojë, shpërthyen zjarre të mëdha dhe rreth 6,000 banorë mbetën pa energji elektrike.
Kreu i administratës ushtarake lokale, Dmytro Bryzhynskyi, konfirmoi se objektivat ishin jetike për funksionimin e qytetit, duke theksuar se “armiku shënjestroi infrastrukturën kritike”.
Reagimet ndërkombëtare nuk munguan. Përfaqësuesja e Lartë e BE-së për Politikën e Jashtme, Kaja Kallas, e dënoi ashpër sulmin, duke akuzuar Moskën për përdorim të qëllimshëm të terrorit ndaj civilëve.
“Rusia po vazhdon të vrasë civilë të pafajshëm. Përgjigjja jonë duhet të jetë më shumë mbështetje për Ukrainën dhe më shumë presion ndaj Rusisë,” deklaroi ajo.
Ndërkohë, vendet perëndimore kanë intensifikuar ndihmën ushtarake për Ukrainën. Gjermania ka arritur një marrëveshje armësh prej 4 miliardë eurosh, ndërsa Mbretëria e Bashkuar dhe Holanda kanë njoftuar paketa të reja mbështetjeje.
Lufta në Ukrainë tashmë ka hyrë në vitin e pestë, ndërsa përpjekjet për paqe mbeten të bllokuara. Ndërmjetësimi i Shtetet e Bashkuara ka humbur ritëm, sidomos pasi fokusi është zhvendosur drejt krizave në Lindjen e Mesme.
Në terren, realiteti është brutal: sulmet po intensifikohen, ndërsa një armëpushim i qëndrueshëm duket ende larg.
