Gjykata Supreme e Kosovës e ka hedhur poshtë si të palejuar ankesën e Blerim Isufajt kundër vendimit për shkarkimin e tij nga posti i kryeprokurorit të Prokurorisë Speciale. Supremja ka vlerësuar se vendimi i Këshillit Prokurorial të Kosovës (KPK) është akt administrativ dhe se ligjshmëria e tij duhet të shqyrtohet përmes procedurës së konfliktit administrativ.
KPK-ja më 2 tetor 2026 kishte vendosur për shkarkimin e Isufajt, i cili më pas iu drejtua Gjykatës Supreme, duke u bazuar në Ligjin për Përgjegjësinë Disiplinore të Gjyqtarëve dhe Prokurorëve.
Megjithatë, Gjykata Supreme ka konstatuar se në këtë rast nuk ekziston bazë e mjaftueshme ligjore për të ushtruar kompetencën e veçantë të paraparë me këtë ligj.
“Ankesën e ankuesit ta hedhë si të palejuar”, thuhet në njoftimin e Gjykatës Supreme.
Pse u shkarkua Isufaj?
Sipas konstatimeve të Këshillit Prokurorial të Kosovës, gjatë kohës kur Blerim Isufaj drejtonte Prokurorinë Speciale kishte pasur probleme që lidhen me:
- Keqmenaxhimin e Prokurorisë Speciale;
- Mungesën e kompetencës në ushtrimin e funksionit të kryeprokurorit;
- Dështimin në përmbushjen e detyrave dhe përgjegjësive;
- Mosplotësimin e standardeve të kërkuara të performancës.
Këto ishin arsyet e paraqitura nga KPK-ja për vendimin e shkarkimit.
Isufaj ishte propozuar edhe për kryeprokuror të Shtetit
Blerim Isufaj ka qenë një nga figurat më të kritikuara të sistemit prokurorial nga Lëvizja Vetëvendosje, e cila është në pushtet.
Ai ishte votuar nga Këshilli Prokurorial i Kosovës për pozitën e kryeprokurorit të Shtetit, por procesi nuk kishte përfunduar me dekretim nga ish-presidentja Vjosa Osmani.
Vendimi i fundit i Gjykatës Supreme lidhet me ankesën e Isufajt kundër shkarkimit nga drejtimi i Prokurorisë Speciale. Sipas vlerësimit të gjykatës, ligjshmëria e këtij vendimi duhet të kontestohet në procedurën përkatëse administrative.
