Zyrtarë të lartë të sigurisë kombëtare të administratës amerikane zhvilluan të premten një takim të fshehtë në Camp David, ku diskutuan hapat e ardhshëm lidhur me luftën në Iran dhe konfliktin mes Arabisë Saudite dhe rebelëve Houthi në Jemen.
Sipas Axios, takimi zgjati disa orë dhe u kryesua nga zëvendëspresidenti amerikan J.D. Vance. Tre zyrtarë amerikanë i thanë medias se takimi nuk ishte njoftuar paraprakisht nga administrata e presidentit Donald Trump.
Në takim morën pjesë, ndër të tjerë, sekretari i Shtetit Marco Rubio, sekretari i Mbrojtjes Pete Hegseth, i dërguari i Shtëpisë së Bardhë Steve Witkoff, drejtori i CIA-s John Ratcliffe dhe kryetari i Shefave të Përbashkët të Shtabit, gjenerali Dan Caine.
Sipas Axios, takimi i ngjan një mbledhjeje të ngjashme të zhvilluar në qershor 2025, pak ditë para përshkallëzimit të atëhershëm të konfliktit mes Izraelit dhe Iranit. Në qendër të diskutimeve këtë herë ishin zhvillimet në Iran dhe situata në Jemen, ndërsa bisedimet diplomatike me Teheranin raportohet se kanë ngecur.
Axios raportoi gjithashtu se presidenti Trump po shqyrton mundësinë e rifillimit të operacioneve ushtarake në shkallë të gjerë kundër Iranit, megjithëse në këtë fazë nuk është bërë i ditur ndonjë vendim përfundimtar.
Trump, duke folur të enjten për negociatat me Iranin, deklaroi se tani duhet të merret një vendim për arritjen e një marrëveshjeje. Ndërsa të premten, kur u pyet nga gazetarët për hapin e ardhshëm të administratës së tij, ai tha se nuk mund të japë detaje, por shtoi se zhvillimet “po shkojnë shumë mirë” dhe se Irani “nuk po ecën mirë”.
Në të njëjtën kohë, Arabia Saudite po përgatitet për një operacion kundër Houthive në Jemen dhe ka kërkuar mbështetje amerikane. Reuters raportoi se Riadi po planifikon një ofensivë ushtarake për të rimarrë kontrollin e zonave strategjike dhe të ngushticës Bab el-Mandeb, ndërsa SHBA-ja deri tani ka ofruar mbështetje në inteligjencë dhe objektiva dhe jo goditje direkte amerikane kundër Houthive.
Takimi në Camp David vjen në një moment kur konflikti me Iranin dhe përplasjet me grupet e mbështetura nga Teherani po vazhdojnë, ndërsa përpjekjet diplomatike për një marrëveshje mbeten të pasigurta.
