Garda Revolucionare e Iranit ka rritur sërish tensionet në Ngushtica e Hormuzit, duke sulmuar të paktën dy anije tregtare pas njoftimit për rivendosjen e kufizimeve në këtë rrugë jetike detare.
Sipas raportimeve ndërkombëtare, një tanker indian dyshohet se është qëlluar me armë të vogla, ndërsa kapiteni ka dërguar sinjal emergjence. Në një regjistrim audio që qarkullon, ai dëgjohet duke thënë: “Na dhatë leje të lëvizim, pse po na sulmoni?!”, ndërkohë që në sfond dëgjohen të shtëna.
Burime të sigurisë detare, të cituara nga Reuters, bëjnë të ditur se të paktën dy anije raportuan sulme gjatë përpjekjes për të kaluar nëpër ngushticë.
Ndërkohë, Operacionet Tregtare Detare të Mbretërisë së Bashkuar konfirmuan se dy mjete luftarake të lidhura me Gardën Revolucionare hapën zjarr ndaj një tankeri pa paralajmërim paraprak. Megjithatë, sipas autoriteteve britanike, anija dhe ekuipazhi i saj janë të sigurt.
Ngjarja vjen në një moment kritik, kur situata në rajon mbetet e tensionuar dhe çdo përshkallëzim në Hormuz – një nga arteriet kryesore të furnizimit global me energji – rrezikon të ketë pasoja të menjëhershme në tregjet ndërkombëtare.
Zhvillimet e fundit hedhin dyshime mbi stabilitetin e armëpushimeve të fundit dhe sinjalizojnë një rikthim të rrezikut në një nga pikat më strategjike të globit.
