Izraeli dyshohet se ka ngritur dhe operuar dy baza sekrete ushtarake në territorin e Irakut, të përdorura si pika strategjike për operacione kundër Iranit, raportoi The New York Times, duke zbuluar detaje të reja mbi infrastrukturën e fshehtë ushtarake izraelite në rajon.
Sipas raportimit, këto baza janë ndërtuar për të shkurtuar ndjeshëm kohën e fluturimit të avionëve luftarakë izraelitë drejt objektivave në Iran, duke shërbyer njëkohësisht si qendra logjistike për Forcën Ajrore të Izraelit.
Burimet e cituara nga media amerikane bëjnë të ditur se në këto objekte janë vendosur edhe njësi të operacioneve speciale, si dhe ekipe të kërkim-shpëtimit, të gatshme për ndërhyrje në rast emergjencash gjatë misioneve ushtarake.
Sipas të dhënave, njëra prej bazave është ndërtuar në fund të vitit 2024, por aktualisht nuk besohet të jetë aktive, ndërsa statusi i bazës tjetër mbetet ende i paqartë.
Raporti shton se Shtetet e Bashkuara kanë qenë në dijeni të paktën për ekzistencën e njërës prej bazave, çka mund të ngrejë pikëpyetje të reja mbi koordinimin e aleatëve në rajon.
Ndërkohë, banorë lokalë beduinë kishin raportuar lëvizje të pazakonta në zonat ku dyshohet se ndodheshin bazat, por sipas raportimeve, ushtria irakiane kishte zgjedhur të monitoronte situatën nga distanca, pa ndërhyrë menjëherë.
Një episod tragjik lidhet me një bari beduin, i cili sipas familjarëve u vra pasi iu afrua njërës prej bazave. Pretendohet se ai kishte njoftuar më herët autoritetet irakiane për aktivitetin e dyshimtë në zonë.
Më vonë, gjatë një operacioni të forcave irakiane pranë njërit prej lokacioneve, raportohet se një ushtar irakian humbi jetën dhe dy të tjerë mbetën të plagosur, pas një shkëmbimi zjarri që dyshohet të ketë ardhur nga forca izraelite.
Nëse këto pretendime konfirmohen, bëhet fjalë për një zhvillim me pasoja të mëdha gjeopolitike në Lindjen e Mesme, duke shtuar tensionet mes Izraelit, Iranit dhe Irakut në një moment tashmë të ndezur në rajon.
