Një ngjarje e rëndë ka tronditur këtë të diel Deçan, ku dy persona kanë humbur jetën tragjikisht si pasojë e goditjes nga energjia elektrike në fshatin Maznik.
Lajmi është konfirmuar nga zëdhënësi i Policisë për Rajonin e Pejë, Driton Rugova.
Sipas informacioneve të para, dyshohet se viktimat kanë rënë në kontakt me rrymën elektrike teksa po pastronin veturën në oborrin e shtëpisë së tyre.
Fillimisht, ata janë dërguar për trajtim në QKMF-në e Deçanit, ndërsa më pas janë transferuar në Spitalin Rajonal të Pejës, ku mjekët kanë konstatuar vdekjen e tyre.
“Fillimisht janë dërguar në QKMF-në e Deçanit, e më pas në Spitalin Rajonal të Pejës, ku edhe është konstatuar vdekja e tyre”, deklaroi Rugova.
Viktimat janë identifikuar si Xhemajl Mustafaj dhe Hasan Mustafaj, babë e bir.
Autoritetet kanë nisur hetimet për të sqaruar rrethanat e plota të kësaj tragjedie.
