Presidenti i Shteteve të Bashkuara, Donald Trump, ka lëshuar një kërcënim të drejtpërdrejtë ndaj Omanit, në një tjetër përshkallëzim të retorikës amerikane lidhur me konfliktin me Iranin dhe statusin e Ngushticës së Hormuzit.
Në një intervistë për gazetarin e Fox News, Trey Yingst, Trump deklaroi se SHBA-ja do të ndërhynte ushtarakisht nëse Omani do të pengonte arritjen e një marrëveshjeje për ngushticën.
“Nëse Omani na pengon, do ta bombardojmë deri në fund”, deklaroi Trump, duke shtuar se Irani duhet të “ngrejë flamurin e bardhë të dorëzimit”.
Përplasja për Ngushticën e Hormuzit
Ngushtica e Hormuzit është një prej korridoreve më strategjike të transportit detar të energjisë në botë. Bregdeti iranian shtrihet në pjesën veriore të ngushticës, ndërsa Omani kontrollon pjesën jugore.
Sipas raportimeve, zyrtarët iranianë dhe ata omanë kanë zhvilluar gjatë javëve të fundit bisedime për të ardhmen e navigimit detar dhe marrëveshjet që lidhen me qarkullimin në këtë zonë.
Ministria e Jashtme e Iranit ka bërë të ditur se po punohet edhe për një deklaratë të përbashkët.
Trump, ndërkaq, ka këmbëngulur se Ngushtica e Hormuzit duhet të jetë nën kontrollin amerikan, pavarësisht kufizimeve të trafikut.
Presidenti amerikan deklaroi gjithashtu të premten se mund ta shpallte ngushticën pjesë të territorit amerikan. Teherani reagoi duke e kundërshtuar këtë pretendim dhe duke deklaruar se ngushtica “do të mbetet iraniane”.
Trump: Nuk po nxitoj për marrëveshje
Në intervistën e tij, Trump pranoi se ekziston një kanal i drejtpërdrejtë komunikimi me Gardën Revolucionare të Iranit.
Ai gjithashtu tha se nuk është duke nxituar për arritjen e një marrëveshjeje, pavarësisht vazhdimit të konfliktit dhe presionit politik në Shtetet e Bashkuara.
Çështja është veçanërisht e ndjeshme për Uashingtonin për shkak të zgjedhjeve të mesmandatit që pritet të mbahen në nëntor, në të cilat demokratët synojnë të marrin kontrollin e Kongresit.
Ngushtica, pikë kyçe për tregjet globale
Çdo përshkallëzim rreth Ngushticës së Hormuzit mund të ketë pasoja të drejtpërdrejta për transportin detar, furnizimin global me energji dhe çmimet e naftës.
Përplasja mes SHBA-së dhe Iranit, ndërkohë, e ka kthyer ngushticën në një nga pikat më të rrezikshme strategjike në Lindjen e Mesme, ndërsa roli i Omanit si shtet fqinj dhe kanal diplomatik mes palëve e bën Muskatin një aktor kyç në zhvillimet e ardhshme.
