Presidenti amerikan Donald Trump ka kundërshtuar thirrjet për ngadalësimin e zhvillimit të inteligjencës artificiale, duke thënë se Shtetet e Bashkuara duhet të ruajnë avantazhin ndaj Kinës në këtë fushë.
Trump i cilësoi si të ekzagjeruara disa prej paralajmërimeve për rreziqet që mund të sjellë zhvillimi i pakontrolluar i inteligjencës artificiale, ndërsa theksoi rëndësinë strategjike të teknologjisë për Shtetet e Bashkuara.
“Besoj se ka shumë forca negative që e ngrenë këtë çështje pa pasur arsye, duke sjellë në diskutim skenarë që nuk do të ndodhin”, deklaroi Trump në përgjigje të pyetjeve të gazetarëve.
Presidenti amerikan tha se SHBA-ja aktualisht ka epërsi ndaj Kinës në fushën e inteligjencës artificiale dhe se dëshiron që ky avantazh të ruhet.
“Shtetet e Bashkuara janë në avantazh ndaj Kinës në inteligjencën artificiale. Ne jemi vendi më i avancuar në botë. Dhe, sinqerisht, dua që të mbetemi të tillë, sepse kush fiton në fushën e inteligjencës artificiale, fiton mbi të gjithë”, u shpreh Trump.
Ai hodhi poshtë kërkesat për frenimin e zhvillimit të AI-së, të cilat janë nxitur nga shqetësimet se teknologjia mund të dalë jashtë kontrollit njerëzor.
“Ne mund të vendosim masa mbrojtëse, mund të bëjmë këtë apo atë, por besoj se ka shumë forca negative që e ngrenë këtë çështje, duke sjellë në diskutim gjëra që nuk do të ndodhin”, tha presidenti amerikan.
Kompanitë e AI paralajmërojnë për rreziqet
Deklaratat e Trump vijnë në një kohë kur disa prej kompanive më të mëdha të inteligjencës artificiale kanë ngritur shqetësime për rreziqet që mund të shoqërojnë zhvillimin e mëtejshëm të kësaj teknologjie.
Ndër kompanitë që kanë folur për këto rreziqe është edhe Anthropic. Drejtuesi i saj, Dario Amodei, ka paralajmëruar se inteligjenca artificiale mund të keqpërdoret për qëllime të rrezikshme, duke përfshirë sulme kibernetike, bioterrorizëm dhe shkaktimin e tronditjeve të rënda ekonomike.
Në këtë kontekst, disa prej drejtuesve të industrisë kanë kërkuar më shumë masa sigurie dhe kujdes gjatë zhvillimit të sistemeve gjithnjë e më të avancuara të AI-së.
Përplasja mes këtyre qëndrimeve vjen në një periudhë kur gara teknologjike mes SHBA-së dhe Kinës për zhvillimin e inteligjencës artificiale po intensifikohet.
Ndërsa kompanitë dhe ekspertë të ndryshëm paralajmërojnë për rreziqet e mundshme, administrata amerikane e sheh ruajtjen e epërsisë në AI si një çështje të rëndësishme strategjike dhe ekonomike për Shtetet e Bashkuara.