Presidenti amerikan Donald Trump duket se ka mbyllur me sukses atë që mediat amerikane po e quajnë “turneu i hakmarrjes politike”, duke eliminuar një sërë republikanësh që i dolën kundër, në një demonstrim të fortë të kontrollit të tij mbi Partinë Republikane.
Goditja më e fundit erdhi me humbjen e Thomas Massie në Kentucky dhe dështimin e Brad Raffensperger në garën për guvernator të Xhorxhias, duke vulosur dominimin e Trumpit në zgjedhjet paraprake republikane.
Massie, një nga kritikët më të fortë republikanë të Trump, kishte zemëruar presidentin me kundërshtimin ndaj projektligjeve të tij të brendshme, qëndrimet për Iranin dhe kërkesat për publikimin e dosjeve Epstein. Trump e kishte kthyer rrëzimin e tij në mision personal.
Në Kentucky, kandidati i mbështetur nga Trump, Ed Gallrein, fitoi pas një beteje rekord financiarisht, ku aleatët e presidentit dhe grupet pro-Izrael shpenzuan rreth 16 milionë dollarë për ta mposhtur Massie.
Në Xhorxhia, Brad Raffensperger, i njohur për përplasjen me Trump pas zgjedhjeve të vitit 2020, dështoi të siguronte balotazhin në garën republikane për guvernator, ndërsa kandidati i mbështetur nga Trump dominoi.
“Trump e provoi edhe një herë fuqinë e tij në Partinë Republikane”, thanë analistët politikë amerikanë, duke theksuar se mbështetja e tij mbetet valuta më e fortë në primaret republikane.
Megjithatë, kjo ofensivë politike mund të ketë edhe kosto. Kritikët paralajmërojnë se agresiviteti ndaj figurave libertariane dhe izolacioniste si Massie mund të krijojë përçarje në bazën që e riktheu Trumpin në Shtëpinë e Bardhë, sidomos mes votuesve më të rinj republikanë.
