Presidenti i Shteteve të Bashkuara, Donald Trump, është pritur me ceremoni zyrtare në Japoni, në fazën e fundit të një turneu pesëditor në Azi, që synon të përmbyllet me një marrëveshje për armëpushim tregtar me Kinën.
Gjatë udhëtimit, që është më i gjati i tij jashtë vendit që nga marrja e detyrës, Trump ka nënshkruar marrëveshje tregtare dhe për mineralet kritike me katër vende të Azisë Juglindore. Ai pritet të takohet me presidentin kinez Xi Jinping të enjten në Korenë e Jugut.
Sipas zyrtarëve amerikanë, negociatorët nga Uashingtoni dhe Pekini kanë rënë dakord për një kornizë fillestare që synon ndalimin e tarifave shtesë amerikane dhe kufizimeve kineze mbi eksportin e metaleve të rralla — zhvillim që ka bërë që tregjet aziatike të ngrihen në nivele rekord.
“Kam shumë respekt për Presidentin Xi dhe besoj se do të arrijmë një marrëveshje”, tha Trump për gazetarët në bordin e Air Force One para uljes në Tokio.
I veshur me një kravatë të artë dhe kostum blu, Trump bëri një tur panoramik të Tokios përpara se të vizitonte Pallatin Perandorak, ku u prit nga Perandori Naruhito. Siguria në kryeqytetin japonez ishte e lartë, me mijëra policë të vendosur në terren, pas arrestimit të një personi të armatosur jashtë ambasadës amerikane disa ditë më parë.
Trump ka siguruar një premtim investimi prej 550 miliardë dollarësh nga Tokio, në këmbim të lehtësimit të tarifave të importit.
Sekretari amerikan i Tregtisë, Howard Lutnick, dhe homologu japonez Ryosei Akazawa diskutuan mbi investimet në rrjetet e energjisë gjatë një dreke pune në Tokio.
Ndërkohë, kryeministrja japoneze Sanae Takaichi pritet ta impresionojë Trump me plane për blerjen e kamionëve, sojës dhe gazit amerikan, si dhe me një marrëveshje për ndërtimin e anijeve. Takaichi, e cila u bë kryeministrja e parë femër e Japonisë javën e kaluar, e cilësoi forcimin e aleancës me SHBA-në si “prioritet të saj kryesor”.
“Mendoj se ajo do të jetë shumë e mirë,” tha Trump, duke kujtuar miqësinë me ish-kryeministrin e ndjerë Shinzo Abe.
Trump ishte udhëheqësi i parë i huaj që takoi Naruhiton pas ngjitjes së tij në fron në vitin 2019. Megjithëse roli i perandorit është ceremonial, diplomacia e vërtetë do të zhvillohet gjatë takimit të Trump me Takaichi në Pallatin Akasaka, ku të dy pritet të nënshkruajnë një memorandum mirëkuptimi për investimet në industrinë detare.
Kryeministrja japoneze do të sigurojë gjithashtu Trump për angazhimin e Japonisë ndaj sigurisë rajonale, me plane për rritjen e shpenzimeve të mbrojtjes në 2% të PBB-së, në kuadër të programit më të madh të forcimit ushtarak që nga Lufta e Dytë Botërore.
Megjithatë, Takaichi mund të përballet me vështirësi në rritjen e mëtejshme të buxhetit të mbrojtjes, pasi koalicioni i saj qeverisës nuk ka shumicën në parlament.
Trump do të udhëtojë të mërkurën drejt Gyeongju në Korenë e Jugut, ku do të takohet me Presidentin Lee Jae Myung. Edhe pse korniza e një marrëveshjeje tregtare me Seulin është gati, ajo nuk pritet të finalizohet këtë javë, sipas Sekretarit të Thesarit Scott Bessent.
Takimi i shumëpritur me Xi Jinping, i planifikuar për të enjten, vjen në një moment tensionesh të larta tregtare, teksa Uashingtoni dhe Pekini kanë shkëmbyer tarifa të reja dhe kufizime ndaj teknologjive kritike dhe metaleve strategjike.
Megjithëse pritjet për një marrëveshje të plotë janë të ulëta, një armëpushim tregtar i përkohshëm shihet si një sinjal i mundshëm i shkrirjes së akujve mes dy ekonomive më të mëdha në botë.
