Presidenti i Shteteve të Bashkuara, Donald Trump, pritet të nënshkruajë dy urdhra ekzekutivë që synojnë të kufizojnë praktikën e njohur si “turizmi i lindjeve” (birth tourism), përmes së cilës shtetas të huaj udhëtojnë në SHBA për të lindur fëmijë që përfitojnë shtetësinë amerikane.
Sipas raportimit të Axios, masat e reja synojnë të pengojnë fitimin automatik të shtetësisë amerikane në raste të caktuara dhe parashikojnë gjithashtu që fëmijët e disa punonjësve diplomatikë të huaj të lindur në SHBA të mos përfitojnë shtetësinë amerikane. Raporti shton se këto masa mund të shtrihen edhe në territoret amerikane në të ardhmen.
Ceremonia e nënshkrimit ishte planifikuar të zhvillohej në Zyrën Ovale, por sipas Axios, aktiviteti u vonua dhe nuk kishte nisur as 55 minuta pas orarit të parashikuar.
Aktualisht, në SHBA nuk ekziston një ligj federal që ndalon drejtpërdrejt “turizmin e lindjeve”. Megjithatë, që nga viti 2020 është në fuqi një rregullore federale, e miratuar gjatë mandatit të parë të Trump, e cila ndalon përdorimin e vizave turistike ose të biznesit për persona që udhëtojnë me qëllim sigurimin e shtetësisë amerikane për fëmijët e tyre.
Autoritetet amerikane kanë paralajmëruar se personat e përfshirë në skema të organizuara të “turizmit komercial të lindjeve” mund të ndiqen penalisht për mashtrim me viza ose shkelje të tjera të ligjit.
Nuk ka statistika zyrtare mbi numrin e grave që kanë udhëtuar në SHBA me këtë qëllim dhe as mbi koston që kjo praktikë mund t’u ketë shkaktuar taksapaguesve amerikanë.
Sipas një analize të publikuar në vitin 2020 nga Qendra për Studimet e Emigracionit, një institut që mbështet politika më të ashpra të emigracionit, rreth 20 mijë deri në 25 mijë gra kanë udhëtuar në SHBA gjatë viteve 2016–2017 për të lindur dhe për t’u siguruar fëmijëve shtetësinë amerikane.
Ndërkohë, të dhënat zyrtare tregojnë se gjatë vitit 2025 në Shtetet e Bashkuara janë regjistruar rreth 3.6 milionë lindje.
